Page:Castets - La Chanson des quatre fils Aymon, 1909.djvu/511

483

les quatre fils aymon

Encui vos sera mis el col li chaieingnon.
Çou cuit je ores bien, Renaus li fiux Aymon,
6935Que vostre agait aies ne gaires de ci loing,
Et si nos cuidies ore sosmetre en lor broion ;^[1]
Mais je comant mes homes, tot isi com il sunt,
Et as compaignons Charle, tot si com plevi l’ont,
Que assaillir vos voisent sens nule arestison. »
6940« Par foi, ce dist Renaus, et nos nos desfendrom.
Aallart, dist Renaus, comant esploiterom ?
Il n’i a plus ne mains, la bataille averom.
Or nos en consaut Dex qui par Anonciom^[2]
Nasqui en Belleem à guisse d’enfançon.
6945Aallart, biaus dous frere, .ii. et .ii. nos metom ;^[3]
Desfendes moi derriere et je vos à bandon ;
Et entre moi et vos nos .ii. freres meton ;
Endui sunt li plus jone et li mains né de nos. »
« Frere, ce dist Richars, ja voir ne vos faudron. »
6950« Renaut, ce dist Allars, aideres nos vos donc ? »
« Oïl, ce dist Renaus, se Deu plaist et son nom. »
« Hé Dex ! ce dist Alars, com fol pensé aviom
Ki cuidiens que Renaus seüst la traïson
Et que il nos livrast l’empereor Charlon.
6955Certes il nel feist por nul avoir del mont. »
« Par foi, ce dist Guichars, or n’ai je se bien non,
Puis que Renaus li ber se tenra devers nos.
Tant con Renaus vivra, tant garirommes nos.
Mais puis qu’il sera mort, ja n’en eschaperon. »
6960Puis commendent Renaut à Deu et à son nom,
Et il comenda eus au cors saint Symion.
Devant eus ont tornés lor mentiaus vermillons ;
Estes vos assemblés les .iiii. compaignons
Qui por peor de mort ja jor ne se faudront.
6965Fouques point le cheval des tranchans esperons ;
Il a brandi la hante, destort le confanom
Et vait ferir Renaut el mentel vermeillon.

1. 6936 M en vo broion.
2. 6943-6944 M conseut chil sire qui par Annuncion Nasqui en Bethleem en.
3. 6945 M dos à dos.