Il me fera tel honte, com vos oï aves.
Quant Renaus vint à moi, n’estoie preu amés,
En Ba[s]cle n’en Navarre servis ne honorés.[1]
Il a mes anemis plaisiés et craventés
Et mené à mes piés, si ont merci crié.[2]
Par lui sui durement essauciés et leves.
Or vos pri sor la foi que plevi m’aves,
Et sor le sairement que juré m’i aves,
Et par le saint batesme que recoilli aves,
Et par le jugement qu’as armes atendes,[3]
Que vos me conseillies, si com faire deves.
« Seignor, dist li rois [Yus], .i. conseil vos demant ;
Mais je vos pri por Deu, le pere roiamant,
Que nel me dones mie del tot à mon talant.
L’empereres de France, o son neveu Rollant,
Et Ogiers li Danois o Richart le Norment,
Estout li fils Oedon, Oliviers li vaillant,
Sunt entré en ma terre, molt me vont menaçant.
Se je les fils Aymon, tos .iiii., ne li rent.
Il me feront grant honte, par le mien esciant,
Mais, par icel apostre que quierent peneant,
Onques jor li miens peres ne fu del sien tenant.
Non sera ja li fils nul jor de son vivant. »
Hunaus de Tailleborc a parlé tot avant :
« Sire, rois de Gascoigne, que ales vos disant ?
De coi ales vos donc le conseil demendant,
Quant dites que Renaut ne seres ja faillant ?
Mais mendes vostre empire et arriere et avant
De Bascle, de Navare, de Gascoigne la grant.
S’alons à Montbandel où Charles est seant ;
Si nos i combatons bien et hardiement.
Quant nos aurons vaincu Olivier et Rollant,
Tot aurons acuité desi en Oriant.
Ahi ! rois de Gascoigne, com tu as sens d’enfant,