Ja a pris Mombandel, la maistre fermeté ;
Là est Charles, mes sires, en non Deu ostelés.
Si grant ost a o lui, ne puet estre aesmés.
Si vos mande mes sires, ja ne vos iert celé :
Se vos les fius Aymon tantost ne li rendes
Et se vos envers lui .i. sol jor les tenes,
Qu’il aient en desfense ne chastel ne cité,
Il vos fera grant honte, si com vos a mandé.
Il vos fera la barbe et les grenons plumer
Et les membres del cors .i. et uns desevrer. »
Quant li rois l’entendi, tos en est tressués ;
La chars li est noircie, li sans li est mués,
Le mesage regarde par molt grant cruelté,
Et tint i. bastoncel de coivre trejeté.
Le baton entesa, il li est eschapés ;
Si fiert en .i. estuel que tos en est tramblés.
Peor ot li mesages qu’il ne fust afolés.
S’il fust aconseüs, il fust mors reversés ;
Mais il i fist que sages, d’autre part est tornés.
« Seignor, ce dist li rois, ales, si le prenes.
Maintenant soit pandus, mar le deporteres.
Quant li glous sera mors et à sa fin alés
A chevaus soit par terre maintenant traïnés
Et puis soit ses cors ars et par polre ventés.
Or ne lairoie mie por l’or de .x. cités,
La mort a aportée, ja n’en iert respités ;
A autres pautonniers ne s’en puisse gaber,
Que jamais à tel prince n’ost tel chosse aporter. »
« Sire, dient si home, merci, por amor Dé.
Nus mesagiers ne doit mal oïr ne trover.
Cil a dit son mesage, il li fu comendé.
Ausi ferions nos s’il nos estoit rové.
En çou ne poons perdre granment ne conquester ;
Se Charles vos asaut, tres bien vos desfendes.
Il est mes Charlemaigne, le meillor coroné
Ki onques fust en France n’en la crestienté ;
Si n’a mort deservie, se vos le commandes.
S’avies cestui mort, ocis ne traïné,
Forment auries Charle correcié et iré.
Page:Castets - La Chanson des quatre fils Aymon, 1909.djvu/471
Le texte de cette page a été corrigé et est conforme au fac-similé.
443
les quatre fils aymon
