Que ja de grant [duel faire] ne monteres en pris.[1]
Bien savons que Raignaus nos a tos escarnis.
Certes bone piece a k’i ne fu nostre amis.
Il ne nos poise tos vallant .ii. Paresis.
Se vos me voles croire, tes consels en ert pris
Dont il sera del cors vergondés et honis,
Et si frere detrait à coes de roncis
Et Amaugis li leres trestos vis enfouis,
Li rois Yus de Gascogne ars en un fu espris.
Faites vos garçons corre et [porter] bries escris[2] ;
Mandes vos chevaliers de par tot vo païs ;[3]
Si soit li os jurée à .vii. ans acomplis. »
Quant l’entent l’emperere, amont dreça le vis.
« Par mon cief, dist li rois, cis consels ert fenis. »
« Sire, ce dist dus Naimes, li viels et li floris,
Qui tel consel vos done, bien doit [cel] estre en pris. »[4]
Segnors, or faites pais, que Dex vos soit amis,[5]
Ihesu de [sainte] glore qui en la crois fu mis.[6]
Si vos dirai canchon ki molt doit estre en pris ;
Ainc n’oïstes mellor, por [voir] le vos plevis.[7]
A une Pentecoste fu Charles à Paris ;
Venus fu de Sessoigne, s’ot Guiteckin ocis ;
Sebile la roïne qui tant ot clar le vis,
Dona à son neveu Bauduin le marchis ;
A son neveu Rollant, l’olifant c’ot conquis ;
Si a mort Amidan, le segnor de Lutis.
Cel jor porta corone li rois poesteïs,
Le grant anel el doi, en la caiere assis.
.xx. contes et .v. dus ot à Rembaut le Fris.
L’emperere de France ses a à raison mis.
« Entendes moi, segnor, dist Charles al fier [vis] :[8]
- ↑ 5114 L dul... ne.
- ↑ 5123 L portes. A B C porter.
- ↑ 5124 B C le païs.
- ↑ 5129 L doit estre. B doit cel estre.
- ↑ 5130 La colonne commence par une S ornée de la hauteur de neuf lignes. Une main moderne a écrit en tête du feuillet : 2e chanson.
- ↑ 5131 L Jhesu de glore. M de sainte gloire.
- ↑ 5133 L vois.
- ↑ 5144 L viers.