La contesse le baise par molt grans amistés.
« Dame, ce dist Renaus, cest chastel me gardes
A v.c. chevaliers que à vos retenres.
Gardes que n’i entre hom qui de mere soit nés,
Fors le roi Yon, vo freres, qui de nos est amés :
Nus autres hom n’i entre, por coi il soit armés,
Jusques à icele eure que vos me raveres. »
« Sire, ce dist la dame, si com vos comendes. »
A dame Deu de glore soies vos comendes.
Adonques s’est Renaus de sa moilliers[1] tornés,
Et Maugis le conduit qui fu preus et senés.
Se roi Yus le seüst, il n’i fust pas alés.
.c. chevaliers enmaine del miex emparentés ;
Or les conduie Dex qui en crois fu penés.
Vont s’en li fil Aymon, ne se vellent targier.
Bien sunt en lor compaigne jusqu’à .c. chevalier.
Ainc en toute la route n’ot ronci ne somier.
Il n’y avoit garçon qui ne maint bon destrier ;
Et trespassent les terres et le païs plenier ;
A Orliens, parmi Loire, se font outre nagier,
Cil del païs demandent : « Qui sont cist chevalier ? »
« Seignor ; ce dist Maugis, nos somes sodoier.
Si alons à Paris nos chevaus essaier.
Charles, nostre empereres, i a fait cours hucier.
Li rois i a fait metre sa corone d’ormier
Et .cccc. mars d’or, .c. pailes qui sunt chier.
Nos i alomes tot, qu’i volons gaaignier. »
Et cil li respondirent : « N’aies soing de [targier][2],
Que s’à tans i venes, vos estuet esploitier.
N’i a que .viii. jors de terme, si vos covient coitier.
Vos chevaus covendra sejorner et saignier,
Quant ce vendra au cors, qu’il soient plus legier. »
Dont s’en vont li baron, si laisent le plaidier.
Il entrent en la voie, pensent de l’esploitier.
Desous Montleeri avoit .i.[3] brueil plenier ;
