[Et respont l’emperere : « Bon conseil me donnes.][1]
Ensi sera il fait, puis que vos le voles. »
Charles, nostre empereres, a fait ses os hucier,
A Paris, sos Monmartre, deles Saine, el gravier,
Viengnent tot li baron, chascuns sor son destrier.
Charles volra veoir trestot le plus legier.
Au cors metra li rois sa corone d’ormier,
Et .cccc. mars d’or et maint bon paile chier.
Or s’en vont li baron, mis sunt el repairier.
.i. mesages s’en torne, qui le cors ot legier ;
De Paris s’en issi, ne se vost atargier
Et trespasse les terres sor son corant destrier.
A Orliens passe Loire, à .i. batel legier ;
Unques ne tresfina tant qu’il vint à Poitier.
Cele nuit i remest desi à l’esclairier.
Au matin est montés, si pense d’esploitier,
Et trespasse Poitau, le grant païs plenier ;[2]
Desi à Montauban ne se vost relaisier.
Au chastel est venus tot droit à l’anuitier ;
Parmi la maistre porte entra ens, sens targier.
Encui fera Renaut tot le sens formoier.[3]
Or est li mesagiers en Montauban entrés
Et descent au perron, desous le pin ramés ;
Tous les degrés de marbre est el palais montés.
Renaus le voit venir, si est encontre alés,
Aallars et Guichars et Richars li senés.
Molt fu bien li mesages baisiés et acolés ;
Renaus li demanda : « Amis, et dont venes ? »
« Sire, devers Paris, où li rois est remés.
Tel chosse i ai oïe, dont forment sui irés. »
« Amis, dites le moi, gardes nel me celes. »
« Sires, dist li mesages, aparmain le saures.
L’emperere de France a merveilleus penses.
Il a .i. sien neveu qui molt est alossés,