Là furent desconfit li païen renoié.
Quant Escorfaus fu pris et à Naimon livrés,
A sa vois haute et clere s’est Rollans escriés :
« Seignor, franc chevalier, de ces autres penses.
Se issi nos eschapent, tos sui deshonorés. »
Et cil li respondirent : « Si com vos comandes.
Ja n’en estordra .i. qui ne soit afolés. »
« Seignor, dist Escorfaus, à moi en entendes.
Cist sunt trestot mi home que vos ici vees.
N’en ocies vos nul, mais trives lor dones.
Asses sunt desconfit, quant retenu m’aves.
Je m’en irai à vos, ce est la verités.
Rendes moi à Charlon que vos tant fort ames,
Et se tant poes faire que je soie acordés,
De lui voldrai tenir toutes mes iretés,
Et si iert mes barnages baptisiés et levés ;
Et qui nel vodra faire, tos sera desmembrés. »
« Par mon chief, dist [Rollans][1] cortoisement parles
Se dus Naimes le loe, ja desdis n’en seres. »
« Oïl, ce dist li dus, car il en dit asses. »
Dont ont li païen trives, li estors est remes.
Rollans et ses barnages est maintenant montés ;
Sor .i. blanc palefrois sist li rois honorés.
Nos barons s’en repairent, es les vos retornés
Et trespassent les terres, les fores et les gués ;
Entresi à Paris n’est Rollans arestés.
Charles ala encontre, qui les a desirrés ;
Son neveu acola, si l’a baisié asses.
« Biaus niés, dist l’enpereres, vos estes retornés.
Dites de vos noveles ; gardes, ne les celes. »
« Sire, ce dist Rollans, aparmain le saures.
Escorfaut avons pris, si vos est amenés.
Sa terre et ses païs vos est abandonés.
Se vos le voles faire, vos gardes i metes
Et il sera demain baptissiés et levés ;
De vos tenra sa terre, se vos le comendes. »
« Biaus niés, dist l’empereres, buer fussies onques nés,
- ↑ 4624 Ms. li rois. A Rollans. M Roullant.
