Tant ont et jor et nuit erré et chevaucié
Qu’il vinrent à Colloingne, la fort archeveschié ;
Lor force ont embunchie en .I. brueillet foillié,
Lors ont desi à l’ost le cembel envoié ;
.V.C. chevalier furent, de bien faire haitié.
Les forriers encontrèrent qui estoient chargié ;
Une proie amenerent d’un chastel c’ont brisié ;
Chaitives et chaitifs ont asses gaaingnié.
Nostre baron s’escrient, si a chascuns hucié :
« Seignor, nostre empereres nos a ça envoié.
Ves ci les Sarrasins que avons covoitié.
Se il or nos eschapent nos somes enginié. »
Lors brochent les chevaus, si les ont eslaisié ;
No baron ont le chaple et l’estor comancié ;
Mort furent Sarrasin, ocis et destranchié.
Les chaitis ont rescous qui estoient lié.
Li os s’est estormie, si sont apareillié
Et montent es chevaus, armé et haubergié ;
Une grandisme liue ont le cembel chacié.
Rollans sort de l’agait qu’il avoit embucié
Et tot si compaignon ne se sunt atargié.
Là peüssies veoir maint haut baron prisié.
Quant il virent les Saines, merveilles furent lié ;
Chascuns point le cheval, s’a l’escu embracié.
Dont veïssies l’estor merveilleus commencié,
Tante roide hante fraite, tant fort escu percié,
Tant hauberc jaseran rompu et desmaillié ;
Des mors et des navrés sunt li larris jonchié.
Qant orent Sarrasins ocis et destranchié,
Escorfaus et si home furent molt esmaié.
Rollans, li niés Charlon, a par force houchié,
Va ferir Escorfaut, ne l’a mie espargnié,
Que l’escu de son col li a frait et percié.
Li haubers fu si fors qu’il n’est mie percié.
Toute plaine sa lance l’a el champ trebuchié ;
Desor lui s’arestut, s’a le branc nu sachié,
Au tranchant de l’espée l’a si fort justisié.
Qu’il le prist au nasel, si l’a amont drecié ;
Il apela Naimon, et si li a baillié.
Page:Castets - La Chanson des quatre fils Aymon, 1909.djvu/431
Cette page a été validée par deux contributeurs.
403
les quatre fils aymon
