« Baron, ce dist li rois, vos me queres amor.
Ki me porcacera, je li croistrai s’onor. »
Ce fu el mois de Mai, à l’entrée d’esté,
Ke florisent cil bois et verdoient cil pré.
Dans Renaus et si frere sunt par matin levé,
Et Richars et Guichars en sunt cacier [alé] ;[1]
Et Renaus est venus à Bordiaus la cité ;
Si a Allart son frere ensanble o lui mené.
Parmi la maistre porte sunt en la vile entré,
A lor ostel descendent, el palais sunt [monté].[2]
Li rois ala encontre, ki l’ot en grant certé,
Ses bras li mist au col, si l’a bien acolé,
.iiii. fois le baisa par molt grant amisté.
Bras à bras en monterent sus [el] palais listé.[3]
Ançois, que l’on eüst le mangier conreé,
[Demandent] les escies, si ont .i. [jiu] joé.[4]
Gadefrois de Melans a premerains parlé :[5]
« Une avision voil dire que jou ai enpensé.
Avint quant m’endormoie en mon lit à celé,[6]
Que veoie Renaut desor un pui monté.[7]
Li puples de cest regne l’avoit si encliné,
N’avoit jusque Ravene ne castiel ne cité
Dont on n’eüst Renaut maistre et seignor clamé,
Et li rois li donoit .i. esprevier mué.
Aval devers Gero[n]de oi [mon] vis retorné ;[8]
Un sangler vi venir poignant tot abrievé ;
Plus de .m. leu le sivent par vive poesté.
Ça s’en venoient .vii. poignant tot aïré,
Qui aloient à cex ki outre erent passé,
Et Renaus i venoit sor Baiart l’aduré.
- ↑ 4226 L aler. M alé.
- ↑ 4230 L entré.
- ↑ 4234 L es. A ou.
- ↑ 4236 L Demanda…jui. Metz : Demandent. ii geus.
- ↑ 4237 A Millanz. M Meullent.
- ↑ 4239 A Ennuit. Metz : Anuit que me dormoie dedens mou lit soef.
- ↑ 4240 A Avis m’iert que Regnaut vi à .i. pui monté. M Re. iert en un mont monté. Metz : que Renaut veoie un pui monter.
- ↑ 4245 L Gerode… moi