Il broce le destrier, tote une randonée,
Et fiert le Tolosant sor la targe listée.
Mai[s] ne li enpira vaillant une denrée.[1]
Atant es vos le roi et sa jent honoré[e] ;[2]
Mes qant il i parvint, si remest la menlée.
Li sire de Tolose fu molt preus et senés ;
Il sist el destrier vair ki molt fu alosés ;
Bien vit, le remanoir n’est pas sa seürtés ;
Plus tost s’en vait fuiant que ne [fait] cers ramés[3]
Et Renaus li preus est apres aceminés.
En .III. arpens de terre en ont tant trespassés
Que li autre ne sevent kel part il sont tornés.
« Hé Dex, [d]ist Aalars, ki en crois fu penés,[4]
Sainte Marie dame, où est Renaus alés ? »
Atant es vos le roi [s’est illec] arestés ;[5]
A sa vois k’il ot clere, s’est molt haus escriés :
« Segnor, franc chevalier, car vos en retornes. »
« Sire, dist Aalars, qu’est ce que dit aves ?
Perdu avons Renaut qui preus est [et] senés. »[6]
Qant li rois l’entendi, si fu au cuer irés ;
Dont vont querant les mors ki gisent par les prés.
Quant Aalars nel trueve, molt en est trespensés,
Detort ses blances mains, s’a ses cevex tirés,
Et Richars et Guichars en sunt as cris alés,
Dont enforce li dex ; jamais tels ne veres.
« Halas, dist Aalars, [caitis, maleürés],[7]
Quant j’essi de mon regne, povre, desiretés,
Avec le melor home ki de mere fust nés.
Caitis, or l’ai perdu, au cuer en sui irés. »
Lor soupire Guichars et Richars est pasmés.
« Segnor, ce dist li rois, por coi vos desmentes ?
Bien vos deves targier, quant vos pas nel troves.
