Page:Castets - La Chanson des quatre fils Aymon, 1909.djvu/406

410

les quatre fils aymon

Et de lonc et de lé en tentist la valée.
3850Li fil Aymon s’eslaissent le fons d’une valée,
A .vii.c. chevalier de mainie priviée ;
Cascuns abat le suen à la lance amorée.
Li sire de Tolose à la ciere menbrée
Sist sor un vair destrier, à la crupe tiulée ;
3855Ne cuit k’il ait mellor en tote la contrée,
Fors Baiart le Renaut, à la sele dorée ;
Voit venir Aalart tote la randonée ;
Grant cop li vait doner sor la tarje roée ;
Desos la bocle d’or li a fraite et troée.
3860Quant Aalars le vit, s’a la color muée,
Tost et isnelement mist le main à l’espée
Et fiert un Tolosant, dona li grant colée ;
La teste à tot le hiame fait voler en la prée.
Li Tolosans le voit, s’a la color muée,
3865Son ceval li ocist d’une [guivre]^[1] empenée ;
Tot entor Aalart fu sa jant asemblée ;
Ja fust ou mors ou pris, sans nule recelée,
Quant Reinaus li cortois vint poignant par le prée
Et Richars et Guichars, sans nule demorée,
3870Et Aumaugis lor a l’enseigne raportée,^[2]
Dont fu grant la bataille et forte la melée.
Tante lance i ot fraite, tante targe troée,
Et tante rice broigne deroute et dessafrée.
L’un mor verse sor l’autre en campet en la prée.
3875Li sire de Tolose n’i fist longe arestée ;
M 103Ains broce le ceval de grant esperonée
Et vait ferir Segart sor la targe roée ;
Desos la bocle d’or li a fraite et troée,
La broine de son dos déroute et desafrée,
3880Le pis li a trencié, le bu et la corée ;
Li cors gist à la tiere, l’arme s’en est alée.
Aalars le coisi à la ciere menbrée,
« Helas, ce dist li quens, com male destinée !
Comm[e]^[3] a cil nostre amor cierement comperée ! »

1. 3865 L guivée.
2. 3870 Il n’est pas dit dans ce qui précède que Renaud s’en soit dessaisi.
3. 3884 L Comm. Michelant : Com m’a cil. A Comme a ciz.