Sire, ce dist Renaus, volentiers et de grés.
Mais or me dites primes où est li rois alés »
Et dist li Senescaus : « Molt par tans le saueres.
En cele cambre à vote est tres hui main entrés ;
Ensamble o lui ses homes, ses drus et ses privés,
Por demander consel, car molt est esfreés.
Beges li Sarrazin l’a guerroié asses
Et brisiés ses castiaus et ses païs gastés,
Cités et abeïes, danjons et fremetés.
Or est dedens Tolose par droite force entrés. »
« Certes, ce dist Renaus, molt par est forsenés. »
A tant es vos le roi, s’est el palais entrés.
Renaus ala encontre, li vassax adurés,
Et Richars et Guichars et Aalars l’ainsnés.
Quant Renaus vit le roi, parfont l’a enclinés ;
De Deu le salua, ki en crois fu penés.
« Damel Dex vos saut, sire, par ses sainte bon[t]és »
« Amis, dist li rois Yus, vos soies honorés.
Dont estes ? de quel terre ? gardes, ne me celes. »
« Sire, ce dist Renaus, molt par tans le sares ;
Nos somes né d’Ardenne, ja mar le mesqueres,
Fil Aymon de [Dordone] ki pros est et senés.[1]
Charles nos a de France caciés et desertés ;
Aymes nos forjura, ço est la verités.
Or alons segnor guerre ki preus soit et senés,
Ki encontre Charlon nos retenist asses. »
« Amis, ce dist li rois, quant compaignons aves ? »
« Sire, ce dist Renaus, aparmain le saueres.
Nos somes bien .vii.c. as armes conreés ;
Mais nos ne voluns mie que vos nos redotes,
Car nos avons de l’or et de l’argent asses,
Ki n’iert jusqu’à .ii. ans despendus ne gastés. »
Quant li rois Yus l’entent, vers tere est enclinés ;
Une molt grant loée s’est li rois porpensés,
Puis apela Renaut, com ja oïr pores.
« Vassax, retenus estes, avec moi demores.
Ne vos faudrai de guerre de ça .ii. ans passés.
Quant de vostre tere [estes][2] issus desiretés,
Page:Castets - La Chanson des quatre fils Aymon, 1909.djvu/403
Cette page a été validée par deux contributeurs.
391
les quatre fils aymon
