Ainc devant Charlemaigne ne me poi remanoir ;
Il me fesist tot pendre et les membres ardoir.[1]
Toute sa volenté li fis par estovoir.
Faire l’estut par force, blasme n’en dui avoir.
Quant [je] vos forjurai, molt en oi le cuer noir.[2]
Vos poes orendroit vostre mere veoir.
Ainc ne vos forjura, je le sai bien de voir.
Elle a or et argent et merveilleus avoir.
Dame Dex le confonde, qui molt nos puet valoir,
Se sufraite en aves, tant c’on le puist avoir
Et tant ne vos en done, quant vendra al movoir,
Que vos à .i. preudome puissies bien remanoir. »
Molt fist Aymes li dus que preus et que senés.
.xx. chevaliers a pris des miex de ses privés ;
Del palais s’en issirent par les amples degrés ;
Par la fause poterne est el vergier entrés.
Illuec se sunt assis desous les pins ramés,
Et la france duçoise a ses fils apelés.
« Enfant, ce dist la dame, ne vos aseürés.
Vostre pere s’en est fors del palais alés ;
Ja n’i rentrera mais, si en seres tornés.
Mais ains seres vos tot baigniés et conreés
Et chauciés et vestus et tres bien afublés.
Ja sembles vos hermites qui de bos soit jetés. »[3]
« Dame, ce dist Renaus, tex est la povretés.
vii ans a acomplis et si sunt tous passés ;
De pieres ne de roches ne poi estre grevés,
Tant est espes li cuirs, ne pot estre entamés.
Or irons seignor querre qui preus soit et senés. »
« Enfant, ce dist la dame, vers Espaigne tornes,
Que li païs est riches, manans et asazés.
Iluec troveres vos remanances asses. »
« Dame, ce dist Renaus, si con vos comandes »
Dedans sa maistre chambre les a o lui menés ;
Ele les a baigniés et tres bien conreés ;
