Atant es vos poignant les .ii. tos abrivés.
Quant il voient les contes, ses ont araisonés :
« Si m’aïst Dex, seignor, trop vos voi mal senés.
Ves ci Aimon vo pere qui est del roi sevrés.
Il vos mande par nos qu’il vos a desfiés. »
« Seignor, ce dist Renaus, jel me savoie asses ;
Mais car ales arriere, trives nos i prenes. »
Et cil li respondirent : « De folie parles ;
Mais se l’on vos asaut, tres bien vos desfendes. »
A iceste parole es les vos retornés.
Atant es vos Aymon où vient tos abrivés.
Quant Renaus voit son pere, si est encontre alés ;
Il l’en [a][1] apelé, con ja oïr pores :
En la moie foi, sire, molt grant tort en aves,
Ki à chascune fois sor nos vos enbates.
Encor en cuit je estre de pechié encombrés. »
« Lechieres, ce dist Aymes, de folie parles ;
Ja n’aures mais bon jor tant com vos sermones.
Orendroit en cel bos hermites devenes.
Refaites ces chaucies, ces maus pas estoupes.
Ce vos covient il faire, puis que vos recrees.
Vos iestes chevaliers, hardis et alossés,
Quiconque vos assaille, tres bien vos desfendes. »
« Sire, ce dist Renaus, par mon chief, droit aves.
Jamais de moie part n’en seres aparlés. »
Adonc a li dus Aymes ses enfans desfiés.
Il broche le destrier, es les vos assemblés,
Et Renaus a ses freres hautement escriés.
Là peüssies veoir tans ruistes cos donés,
Et tante lance fraindre et tans escus troés.
Tant i estut Renaus que ce fu foletés,
Que li meschies en est desor les siens tornés.
De .vii.c. chevaliers à armes conreés,
N’en mena que .l. entre sains et navrés.
Deles .i. montaigne s’en est fuiant tornés,
Et Aymes les enchauce, li viels chenus barbés ;
Trois liues toutes plaines les ont issi menés,
- ↑ 3009 L Il l’en apele. Complété d’après le v. 3109.
