Page:Castets - La Chanson des quatre fils Aymon, 1909.djvu/376

364

les quatre fils aymon

Charles a commendé qu’il soient porseu
Là ot tant paveillon et tant tref destendu
Et tant somier chargié à force et à vertu.
2825L’enchaus lors commencerent desos .i. pui agu.

Vont s’en li fil Aymon, chascun fu molt irés.
Le chastel ont guerpi qu’el [rochier] fu fermés,^[1]
Mais de çou fist Renaus que preus et que senés,
Escuiers et vales ot trestos aroutés ;
2830Devant lui les envoie et rengiés et serrés,
Et Charles les enchauce et ses riches barnés.
Renaus dist à ses freres : « De l’esploitier penses.
Ves ci François venir, je les voi tous armés.
Aalars et Guichars, nos hernas enmenes.
2835Entre moi et Richart seromes arestés
Et detenrom François qui vienent abrivés. »
Et cil li respondirent : « Si com vos comendes. »
Charles, nostre empereres, ne s’est mie arestés ;
Il sist sor .i. cheval, molt fu bien adobés,
2840Et vient apres les contes, qu’il n’i est demorés,
Et Ogiers li Danois et Namles li barbés,
Fouques de Morillon et des autres asses.
Charles, nostre empereres, s’est à vois escriés :
« Si m’aïst Dex, gloton, vos n’i garisteres ;
2845[Trop est longue la fuite que vos amprise aves] ;^[2]
M 76Hui est venus li jors que tot .iiii. morres. »
« Sire, ce dist Renaus, ce n’est pas verités.
Se Deu plaist et Baiart sor coi je sui montés,
Ains que je soie mors, molt chier l’achateres. »
2850Lors a brandie l’ante dont li fers fu quarrés ;
Le cheval li trestorne, si est vers lui alés,^[3]
Quant Hues li Baivers si est avant passés,
Et Renaus li feri con vasaus adurés
Que l’escu de son col li est frais et troés
8855Et l’auberc de son dos derros et desafrés.
Son espié li conduist tres parmi les costés ;

1. 2827 L chastel. A à roche.
2. 2845 Complété d’après A.
3. 2851 M ajoute : Ja fust à Kllm. tout maintenant joustez.