L’emperere de France escria ses barons :
« Seignor, dist Charlemaignes, por Deu quel la ferons ?
Les chevaliers Renaut trovons fiers et felons.
Alons nos ent arriere, si laisons les glotons,
Car cist tornoiemens ne nos est mie bons.
Preis sunt de lor receit, si est fors lor maisons.
Alons nos ent en l’ost, dedans les paveillons.
Trop sunt bon chevalier, ja ensi nos prendrons,
Ne eus ne lor chastel, s’afamer nel poons.
Bien sai, de nule part n’i venra garissons,
Se parmi nos mains non ; ensi les destruirons. »
Et cil ont respondu : « Vostre commant ferons. »
Ja s’en partist li rois sens nule arestissons,
Quant Renaus vint poignant sor Baiart ki fu bons ;
Ensamble o lui ses freres et ses autres barons.
L’empereres les voit, nes tint pas as bricons.
Merveilleus cos se donent par desor les blasons.
Molt est fors la bataille et li chaple sunt grant.
Bien i fierent François, Angevin et Normant,
Et Renaus les akiust par son fier maltalent
Et si frere et si home i fierent ensement ;
Desi ke lors erberges les enmainent ferant.
Illuec ont pris Jociaume, Foucon et Guinement,
Le conte de Nevers et Tieri de Vernant ;
Au chastel les envoient isnellement batant.
Sos Aimon de Dordon ont mort son auferrant
Et li bers est chaüs, puis se dresce en estant
Et Renaus et si frere i sunt venu poignant,
Et Ogiers li Danois li amaine ferrant,
.i. cheval de montaigne, molt isnel et corant.
Il en ot abatu Auberi le ferrant.
« Sire, tenes cestui, s’en faites vo commant. »
Et Aymes i monta, qui le cuer ot joiant.
Et racueillent les contes, ne se vont atargant.
Quant Renaus vit la force qui lor vint au devant,
Il a dit à ses homes : « Partons nos ent atant,
Se nos plus i estons, dont iert la perte grant ;
Ne sera restorée en tot nostre vivant. »
Et cil li respondirent : « Nos ferons vo commant. »
