Se ensi il s’en va, molt faites à blasmer ;
Ne vos poes en moi de nule riens fier.
Je vos weil orendroit cest cheval demander.
Par mon chief, je le vi à Baiart enuier. »
Quant Guichars a oï son frere si parler,
Li cuers qu’il ot el ventre li prist à soslever.
Il a prisse s’espée quant cil s’en dut torner ;
Desor le hiaume à or li vait .i. cop doner,
Desi que es espaules n’i laisa que coper.
Les arçons en a fait vuidier et delivrer.
Le cheval par les reignes est alés recouvrer ;
Venus est à Renaut, si li prist à monstrer :
« Se il vos atalente, or i poes monter.
Li chevaus est molt bons, onques ne vi son per,
Fors seulement Baiart qui tant fait à loer. »
« Certes, ce dist Renaus, molt par vos doi amer.
Montes i orendroit, laisies le vostre aler.
Or avons .ii. chevaus où on se puet fier. »
Et Guichars i monta, qui nel vost refusser ;
Mais ains que il se poissent de la place sevrer,
Vint Aimes de Dordon, li gentis et li ber.
Quant Renaus vit son pere, le sens cuide derver.
De mattalent et d’ire le prent à ramprosner :
« En la moie foi, sire, trop faites à blasmer.
En trop malvais endroit nos venes revisder.
Ja n’est il mie tans c’on doie parenter,
Car tos nos estuet vivre d’acroire et d’emprunter.
Mais or vient la saisons que l’on doit aüner
Et le pain et le blé et le vin entoner.
Au Noel puet on miols son ami esprover. »
« Glotons, ce dist li dus, je vos lo à garder.
Se Charles vos puet prendre, nus ne vos puet tenser,
Qu’il ne vos face pendre ou les membres coper.
Ja vos verra li rois si ruiste cop doner,
S’il de noiant vos aime, molt l’en devra peser. »[1]
- ↑ 2400-2401. — Il est absurde qu’Aymes suppose que le roi s’intéresse à Renaud. Il y a donc lacune avant ces deux vers. A complète le texte :
Perez, ce dist Regnaus, tout ce laissiez es.er.
Ja vous verra li rois…
