Qu’il vos rende Guichart, son frère qu’il a chier,[1]
Qui vostre fil ocist à l’espée d’acier ;[2]
Puis le faites ardoir ou ocirre ou noier.
Por itant se porra de le faide apaier. »
« Ha Dex ! dist l’empereres, qui tot as à baillier,
Com cil a bon conseil, bien fait à otroier !
Mais del mesage avoir ne me sai conseillier. »
« Sire, ce dist dus Naimes, n’aies soing d’esmaier ;
Nos irons el mesage entre moi et Ogier. »
« Naime, ce dist li rois, Dex vos gart d’encombrier.
Car ainc ne me faillistes, quant oi de vos mestier. »
Ogiers et li dus Naimes se vont apareillier
A guise de mesage, ne se volrent targier.
Aalars les escrie : « Qui estes, chevalier ? »
« Sire, ce dist dus Naimes, nos somes mesagier ;
Si volons à Renaut parler et conseillier.
Charles nos i envoie, ki France a à baillier. »
« Par foi, dist Aalars, veer ne le vos quier. »
Il lor œuvre la porte, le pont va abaisier ;
Li baron i entrerent, ne se volrent targier.
Aalars les enmaine contremont el solier ;
Là troverent Renault, si le vont areisnier ;
- ↑ 2191 L B C Guichart. A Richart.
- ↑ 2192 C vostre fiuz. B, ne comprenant plus, altère le texte qui suit :
Et amender le fache Renaus au cors legier.
De Bertelot qu’il tua au ju de l’eschekier.
Que il puist nul de nous de neant damagier.
Ales vous ent arriere, bien li poes nonchier
Que pour lui ne feroie valissant .i. denier.
Je lui presentai droit, voiant maint chevalier,
Onques ne le daigna ne prendre ne baillier.
Renaut, chou dist li dus, à cheler ne vous quier,
Puis que jou ne vous puis à sa merchi ploier,
De moi vous gardez bien, que vous auera mestier.
Lors se sont repairié entre lui et Ogier,
Si ont tout raconté Klm. au vis fier
Que Renaut ne ses freres ne pueent amainier.
Quant l’entent Klm., le sens quide cangier,
Et a dit as barons : Par le cors .s. Richier,
Je ne finerai mais, ses arai detrenchiés.
Or est li empereres à Montesor venus...,