Qui venait de Galisce, de saint Jasque proier ;
A Renaut le conta et à maint chevalier :
L’empereres de France doit venir ostoier.
Par le mien essiantre ce sunt ci li premier.
Alons oïr noveles en cest chemin plenier. »
Et cil li respondirent : « Bien fait à otrier. »
A iceste parole point chascuns son destrier ;
Entreci à la roche ne se volrent targier ;
Guion ont encontré qui venoit tot premier.
Richars l’en apela, qui le cors ot legier :
« Por amor Deu, biau sire, ki sunt cist chevalier ? »
Et cil li respondi : « A celer nel vos kier,
Home somes Charlon, le fort roi droiturier ;
S’en alons en Ardane .i. chastel asegier,
Que par force i ont fait li fil Aimon drecier.
Durement nos travaillent, Dex lor doint[1] encombrier
« Certes, ce dist Richars, je sui lor sodoier.
De tel parole dire ne vos ai pas plus cier.
Le païs et la terre vos doi bien chalengier.
Par Deu, mar le pensastes, se je puis esploitier. »
A iceste parole a brochié le destrier ;
Sor l’escu de son col ala ferir Renier ;
Desous la boucle d’or li fist fendre et percier,
Et l’auberc de son dos desrompre et desmaillier.
El cuer li mist la lance à tot le fer d’acier ;
Tant com hante li dure, l’abat mort del destrier ;
Puis saisist le cheval par la regne d’ormier.
.i. poi se traist arriere, sel baille .i. escuier.
A cel cop assemblerent li autre chevalier ;
Montessor escrierent as lances abaisier.
Là poïssies veoir fier estor commencier,
Tant hauberc jaserant desrompre et desmaillier,
Et l’un mort desor l’autre verser et trebucier.
Tuit sunt mort et ocis et vaincu li premier ;
Ainc cil de l’avangarde ne lor orent mestier.
.i. mes s’en est tornés, sel va le roi noncier :
« Sire, drois empereres, molt vos doit anuier.
- ↑ 2042 L doit.
