Encui aurons estor et bataille enforcie. »
Quant li bons dus Girars a oï la cornée[1]
De l’ost Charlon qui vient de France la loée,
Ses cors a fait corner[2], sa gent est esfraée,
Vestent haubers et hiaumes, tante broine safrée ;
Et si ot çaint le jor tante nobile espée
Et tant cheval corant à la crupe tiulée.
Girars va chevauchant l’embleüre et l’estrée ;
O lui .lx.m. de bone gent armée.
Bondissent cil tabor, grans fu la resonée.[3]
Ja i aura doné tante pesant colée
Et tant baron ocis, navré en le corée
Dont l’ame s’en parti ; n’i pot avoir durée.
Sainte Marie Dame ! com dure destinée
Avint[4] en celui jor sor gent crestianée !
Les os s’entrencontrerent emmi .i. valée ;
Là fu grant la tençon et laide la meslée.
Li bons dus Galerans a s’ensaigne escriée
Monjoie, la Charlemaigne, qui tant fu renomée,
Et Girars, Rosillon, à molt grant alenée.
Endui s’entrencontrerent[5] tot une randonée.
Galerans de Buillon a la lance levée
Et fiert le duc Girart en la targe dorée,
Si que il li avait percie et estroée
Et la broine del dos derompue et fausée[6] ;
Les le costé li passe la grant lance acerée.[7]
Dame Dex le garit et la vertu nomée.
Del sanc qui de lui ist, fa tote ensanglantée.[8]
Li dus de Rossillon li redone colée,
Que la bocle del col li a par mi copée,[9]
