Page:Castets - La Chanson des quatre fils Aymon, 1909.djvu/319

307

les quatre fils aymon

Et Doons de Nantueil le sien ost rasembla.
1065Endui sont ajosté, demorée n’i a.
De Rossillon partirent, cum l’aloe chanta,
Et trespassent la terre où li os assembla.
De lor jornées faire ne vos conterai ja ;
Vindrent à Eigremont qui sor la roche esta.
1070Par deles la cité Girars se herberga
Et li dus environ en le prée loga.
Onques ne fu tele os com li dus amena.
Li dus Bues d’Aigremont onques ne demora ;
A Girart est venus et si l’en mercia.
1075Trestot de chief en chief l’afaire li conta,
Que il ocist Loihier que Charles envoia.
« Or est venus sor moi, sa barbe jurée a
Que s’il me puet tenir, à forches me pendra. »
« Par Deu, ce dist Girars, ja nel se pendra. »
1080Par le mien essient à dolor s’en rira^[1]. »

« Frere, ce dist Girars, ne vos esmaies mie.
Se Charles vient sor vos de France la garnie,
Il i aura bataille, ce ne remenra mie.
Ja jor ne vos falrai, tant com je soie en vie. »
1085« Sire, ce dist dus Bues, mes cuers à vos s’alie. »
A itant l’a laisié la riche baronie,
Desi à lendemain que l’aube est esclarcie,
Que li dus d’Aigremont à la chiere haitie
Fait sa gent conreer et si l’a bien rengie.
1090Il vestent les haubers de cele oevre deugie^[2]
Et çaingnent les espées où chascuns molt se fie
Et montent es chevaus d’Espaigne ou de Rousie.
Adonc s’en sont parti, ne s’atargerent mie^[3]
Et sunt acheminé tres parmi Lombardie^[4].
M 30 1095Droitement envers Troies ont lor oirre aquellie.
La vile ont asegie parmi la praerie.
Li citeain s’esmaient de la cité garnie ;

1. 1080 BC s’en ira. Déjà sans doute l’on était gêné par l’identité des futurs de rire et de raller.
2. 1090 BC treillie.
3. 1093 BC quant l’aube est esclarcie.
4. 1094 Les trois mss. donnent bien Lombardie.