Et cil qui n’i venra, de vos soit desfiés. »
« Baron, dist Charlemaignes, bien sai que vos m’ames.
Issi sera il fait com vos le devises. »
Ses mesages apele, s’a ses bries aprestés
K’il envoie as barons de par tot les regnés.
Li auquant sunt venu et li auquant remés.
Li baron qui l’amerent, cil ne sunt demorés ;
Ains vienent et aünent o grande poestés.
Richars[1] de Normandie, cui Dex croise bontés,
I amena .xx. mile de vasaus esprovés.
Desi que à Paris ne sunt aseürés.
Es pres, par desus Saine, es les vos arotés.
Charles fu as fenestres, si les a regardés ;
De Deu les a saigniés, le roi de majestés.
Puis i vint Salemons, li fors rois coronés,
A tot .xxx. mil homes garnis et aprestés ;
Galerans de Buillon et des autres asses,
Flament et Braibençon ne se sunt arestés
A Paris sunt venu, ki est bone cités.
Onques Dex ne fist home ki de mere fust nés,
Ki les peüst esmer, quant se sunt assemblés.
Par trestoute la terre, c’est fine verités,
Ne remest home à pié, qui ne venist armés.
L’empereres de Rome les a araisonés :
« Baron, dist Charlemaignes, à moi en entendes.
Grant damage m’a fait dus Bues li alosés ;
Loihier mon fil m’a mort, c’est grans desloiautés.
Or en irons sor lui, se vos le me loes. »[2]
Atant sunt escrié Flamenc, li desreés,
Baivier et Aleman dont i avoit ases ;
De commencier batailles furent entalentés.
« Sire, car chevauchies, ne vos aseüres.
Et le matin movrons, quant solaus iert levés,
Et nos vos aiderons de bones volentés.
Le duc Buef asaurons, tot si com vos volres. »
Et Charles respondi : « Dex vos en sache grés.
Page:Castets - La Chanson des quatre fils Aymon, 1909.djvu/315
Cette page a été validée par deux contributeurs.
303
les quatre fils aymon