Page:Castets - La Chanson des quatre fils Aymon, 1909.djvu/309

297

les quatre fils aymon

Onques Dex ne fist home, ce vos os afichier,
Qui n’en eüst pitié, tant eüst le cuer fier.

Grant duel et grant dolor demainent li mesage
750Por le fil Charlemaigne que on tenoit à sage,^[1]
Que li dus Bues ocist là sus en son manage.
M. 21Hé Dex, comme le jor li avint grant damage !
Puis en perdi il terre et il et ses linage.
Si en perdi la teste par deles .i. boschage.
755Charles le fist tuer, à l’aduré corage,
Et puis en fu il guerre par plain et par herbage,
Dont bien .c. mile homes^[2] en morurent à rage,
Que nes pot garendir^[3] escus ne bone targe,
Ne haubers jaserans ne hiaumes de Cartage.
760Seignor, j’ai commencié chançon de vaselage,
De grant chevalerie et de fort ahannage.
Ce fu el mois de mai que li tans^[4] asoage,
Que l’erbe vert est née et la flors el parage^[5],
Plorant et cheminant^[6] repairent li mesage
765Le chemin droiturier envers France le large ;
Si enportent Loihier qui fu de haut parage.
L’empereres de Rome en aura au cuer rage.

Or chevauchent li mes de France la garnie.
Dame Dex les conduie, li fius sainte Marie.
770Molt demainent grant duel, n’i a celui ne die :
« Hé, dus Bues d’Aigremont, li cors Deu te maudie !^[7]
Ains mais ne fist nus dus si grande felonie,
Qui Loihier nos as mort par ta grant trecherie^[8].
Dex, que dira li rois à la barbe florie ?
775Jamais joie n’aura en trestote sa vie. »
Atant vont chevauchant, ne se targerent mie ;
Ne jurent à cité ne à vile garnie

1. 750 B qui ot taint le visage. C qui ot tainte la face.
2. 757 BC Dont .c.m. chevalier.
3. 758 L. garendir. BC garantir.
4. 762 LB tans. C tens. Michelant caus.
5. 763 LB parage. C praage.
6. 764 L cheminant. B gemissant. C gastisant.
7. 771 B Dame Dix te maudie. C Dex te dont male vie.
8. 773 BC lecherie.