Page:Castets - La Chanson des quatre fils Aymon, 1909.djvu/304

Si com esgarderont chevalier et baron,
Se tu ne viens à Charle à ceste Ascension.
Fius à putain, traïtres, ja t’ame n’ait pardon. »^[1]
605Comme li dus l’entant, si froncha le grenon,
Si rogi et mua com se fust .I. charbon.
Il ne desist .I. mot por tot l’or d’Avalon,
Et quant il a parlé, si dist ceste raison ;
« Loihier, mar le pensastes, si m’aïst saint Simon. »
610En haut s’est escriés : « Prenes le moi, baron.
Sa mort a aportée, ja n’aura raençon.
Par la foi que doi Deu, il a sens de bricon. »
Comme sa gent l’oï, n’i font arestison ;
Il asaillent roiaus entor et environ ;
615Mais il se desfendirent à guise de baron.
Loihiers sacha le branc, n’i fist arestison,
Et vost ferir le duc parmi le chief enson,
Quant .I. chevaliers saut qui fist grant folisson.
Et Loihiers le feri sor le chief à bandon,
620Que tot le porfendi desi qu’ens el menton.
Mort l’avoit abatu par desus le perron.
« Oltre, dist-il, cuivers, à Deu maleïçon.
Ta mort as avancie por le cruel felon. »^[2]
Mors est li chevaliers qui nel deservi pas,
625Por l’amor son seignor qui le col avoit cras ;
Et Loihiers s’escria : « Feres, baron, à tas ;
Asaillir nos a fait li cruieus Sathanas.
Ja n’i porra garir par le cors saint Thomas.
Se je l’ataing à cop, jeté a ambesas. »
630La gent au duc Loihier i fierent à mains tas,
Tranchent et poins et piés et espaules et bras ;
De sanc et de cervele i fu grant li esclas.
Chieent i par la sale mort et vaincu et mas ;
Par le mien essient n’en leveront hui mais.^[3]
635La gent le duc Buevon nel tienent mie à gas ;

1. 604 Dans L le mot putain a été gratté soigneusement en laissant le vers faux. Il est conservé dans B C.
2. 623 C répète qui nel deservi pas. B qui forment en fu mas. On souhaiterait une leçon meilleure que celle de L.
3. 634 B ja .I. n’en escapast. C ja nul n’en revenra. Mauvaises leçons.