Ne [fe]riens por lui, si m’aïst saint Vincent,[1]
La monte d’un festu, car nel prissons noiant.
Or est la duceés del tot à mon talent.
Ne feroie por Charle la montance d’un gant.
Vos qui m’aves conté .i. si fait mandement,
Vos en repentires ains le departement.
Mar m’i aves mesdit issi, devant ma gent. »
« Vasaus, ce dist li dus, entendes ma raison.
Charles mande par vos que nos servir l’aillon
A la Natevité ; que terme n’i praignon ;
Si soient owec nos .cccc. compaignon.
Mais par la foi que doi au cors saint Lazaron,
Ne feroie por lui la monte d’un bouton.
Ençois li moverai, se je puis, tel tençon
K’à Paris m’en irai à coite d’esperon,
A .lx. m. homes de diverse façon.
Adonc li monstrerons que mie ne l’amon,
Por amor de mon frere le riche duc Doon. »
« Par foi, ce dist Loihiers, or oi sens de bricon.
Dahé ait hui la barbe qui lui pent au grenon,
Qui son seignor menace, si n’i set ocoison.[2]
Tu ne pues renoier que ne soies ses hom ;
Homage li feïs, ce virent maint baron.
Ta terre te rendi et l’onor environ
Et te fist chevalier à une Ascension ;
Et or l’en rens ici si malvais guerredon !
Enguerran t’envoia, si com nos bien savom,
Por demander son droit ; n’i dist mot sens raison ;
Et quant il [ot] conté le mesage Charlon,[3]
Tu l’oceïs à tort con traïtre felon.
Encor seras pendus com un autre larron
Et si auras fermé el col le chaieignon.
Ja n’auras à garant fermeté ne dongon.
Je te manrai en France comme viautre ou gaingnon.
Iluec seras jugiés en la sale à Loon,
