Es vos venu .i. mes, sens point de demorer.
Les noveles ala au duc Buevon conter,
Ke .ccc. chevalier qui molt font à douter,
Vienent parler à lui de par Charlon le ber ;
Et quant li dus l’entent, Deu prent à mercier.
Atant es vos Loihier et tot si bacheler ;
Desos .i. olivier prendent à arester.
Ce fu el mois de mai, ens el commencement
Que l’herbe verde est née et la flors ensement,
Que li rosingneus chante ens el bos hautement,
Et menu oiseillon par esbaudissement,
Que maintienent amor bacheler de jovent,
Que Loihiers, li fius Charle, o le grant hardement,
Descendi del destrier sos l’olivier qui pent,
O lui .c. damoisiaus qui molt sunt bone gent.
Li gentil escuier n’i funt delaiement ;
Il prendent les chevaus sens nul atargement,
Et li baron s’en vont là sus el mandement,
Là où li dus seoit entre lui et sa gent.
Il en i ot .ii. m. par le mien escient,
Que mandés les avoit et coitiés durement,
Por oïr de Charlon le fier commandement.
A hiaumes, à haubers de grant atornement,
Devant lui, au disner, en servi le jor cent,
Fiux de contes proisiés et de grant tenement ;
Vestu sunt de bons dras trestot à lor talent.
Li uns parole à l’autre bel et cortoisement ;
Li dus Bues d’Aigremont qui tant ot hardement,
Se sist el faudestueil qui à fin or resplent
Et sa moilliers les lui, ki ot le cors molt gent,
Sage fu et cortoisse, molt honore sa gent.
Et si parole au duc bel et cortoisement.[1]
« Sires dus debonnaires, dist la franche moillier,
Ja saves vos molt bien que Charles au vis fier
Est vostres liges sires, ne le poes noier,
- ↑ 461 B C ajoutent trois vers. Leçon de C : Sire, vez le mesage le roi où France apent ; Contre ce qu’il dira, si parlez sagement. Ja estes vos ses bon et del contenement. B et de son tenement.
