Page:Castets - La Chanson des quatre fils Aymon, 1909.djvu/298

286

les quatre fils aymon

« Ales, dist Charlemaignes, à Deu beneïçon ;
Vos amaint et ramaint à vo sauvacion. »
Loihiers se departi, n’i fist arestison.
400Il a vestu l’auberc, lacé l’elme reont ;
.ccc. chevaliers maine, ki sunt de grant renon.
De Paris sunt parti par le congié Charlon.
Demedex les conduie par son saintisme non,
Que jamais en lor vie tot sain ne revendront !
405Hé Dex ! com grant damage et grant destrucion
Avint le jor en France et grant confusion,
Que puis en furent mort .c. m., ce savom,
Et tante jantil dame perdi son compaignon ;
Tante vile en fu puis en fu et en charbon !^[1]

M 12 410Or chevauchent li mes cui Jhesus puist salver,
Par desus lor chevaus qui molt sunt à loer,^[2]
Chascuns vestu l’auberc et lacié l’iaume cler.
.ccc. chevalier sunt qui molt sunt à loer,
Le chemin droiturier ont pris à cheminer ;^[3]
415Trestot lor droit voiage s’en prennent à errer.^[4]
Tout droit à Aigremont en vont lor desirrer ;
Sones et chançonetes commencent à chanter.^[5]
Or vos lairons de ceus cui Jhesus puist sauver,
Si dirons de Buevon ki molt fist à douter.
420Bien set que Charlemaignes ne le pooit amer.
Ses homes a semons, si les a fait mander,
Et il i sunt venu, sens point de demorer.
Bien furent .iiii.m., si com j’oï nonbreir,^[6]
A haubers et à hiaumes, hardi comme sangler.
425Li dus Bues d’Aigremont lor a pris à conter
Com li rois Charlemaignes le voloit malmener.
« Sire, dient si home, ne vos chaut à doter,
Car bien vos aideron, se Dex nos weut sauver. »
Que que il devisoient li gentil bacheler,

1. 409 B C ajoutent : Et tant castiaus brisiés, abatus tant dongon.
2. 411 B C Sur les chevaus braidis. B c’orent fait enseller.
3. 414 C se sont pris à errer. B. se sont pris à aler.
4. 415 B C Parmi la droite voie.
5. 417 Sic L B. C Et sones et flabiaus.
6. 423 B tant les oï esmer. C si com, l’oï conter.