Por çou que le chacai en Puille le reigné ;
Là l’alai jou requerre, n’i pot estre trové.
Mais par icel apostre c’on kiert en Noiron pré,
Je manderai mon ost, semonrai mon barné,
Aigremont aserrai, ja n’estra trestorné ;
Le chastel abatrai, destruirai la cité,
Et se je le puis prendre, il sera vergondé.
Ja n’aura à garant home de mère né,
Tant li soit en aïe, qu’il ne soit affolé. »
[« Sire, ce a dit][1] Aymes, or aves vos juré ;
Gardes, vo seirement ne soient trespassé.
Bien li puet Dex aidier, li rois de majesté,
Ke de vos mains le gart par la siue bonté.
« Baron, dist Charlemaignes, par mon grenon ferrant,
Je vos dirai à tous ce que j’ai en talant ;
Je manderai mes homes orendroit maintenant ;
N’i lairai à semondre Poitevin ne Normant ;
Flamenc et Braibençon venront esperonant,
Engevin et Breton, Berruier ensemant,
Et François et Lombart de la terre vaillant.
Je comant à mes homes ki ci sunt en presant,
Que lor pooir m’amainent asses prochainement,
Ceus qui porront sofrir et paines et haan.
Aigremont asserrai, la fort cité vaillant,
Abatrai le chastel et la tor reluisant,
Puis que li dus ne weut faire tot mon commant ;
Et par icel apostre que quierent penéant,
Se je le puis tenir à mon commandemant,
En haut sera pendus sens nul atargement ;
Mar m’i aura laisié issi vilainement
Par l’amor de Doon o le grenon ferrant,
Que chaitif fis fuïr en Puille la vaillant ».
« Sire, ce a dit Aymes, or li soit Dex aidant.
Mais sachies, empereres, et si vos en di tant,
Ains k’aies Aigremont ne la tor qui resplant,
Ne que facies del duc auques vostre talant,
I aurez vos perdu tant de la vostre gent
- ↑ 51 Sic B C. L.… dist.