Baron, dist Karllesmaines, comment puis esploitier
Des .IIII. fiex Aimon qui si m’ont fait irier ?
J’ai lez .III. en prison qui ne sont pas lanier.
Demain seront pendu sans nisun respitier.
Sire, chou a dit Aimes, la merchi vous en quier.
Ja sont chou mi enfant, iche ne puis noier.
Nel soufferroie mie, [si m’aït][1] S. Richier,
Que il fussent pendu comme larron fossier.
Tenes lez en prison, sire, por Diu du chiel,
Poi [i] aient a boire et petit a mengier,
Il morront a court terme, bien le puis afichier.
Voire, che dist Ogiers et Naimes de Baivier.
Comme Karllez l’oï, prist soi a embronchier,
Il ne deïst .I. mot por l’or de Montpellier,
Mais le los as barons li convint otroier.
En sa chartre parfonde les a fait tresbuchier,
Asses y a culuevres qui font a ressoignier.
Seignour, or escoutes, por Diu le vous requier,
S’oies boine canchon qui moult fait a proisier.
Seignour, or faites pais, s’il vous plaist, escoutez.
S’oies boine canchon qui moult fait a loer.
Ains n’oïstez meillour en trestout vostre aé.
Aalars et Guichars et Richars li maisnez
Sont laiens en la chartre dolant et abosmé,
Pous y a et laisardez a moult grande plenté.
La sont li gentil homme a martire livré,
Mais il n’y seront pas ne yver ne esté,
Se Maugis lor cousin pooit estre conté.
Oies une merveille, ains n’oïstes itel.
Renaus, li fiex Aimon, au corage aduré,
S’en repaire vers Franche quant l’os fu retourné,
Et vient apres ses freres qui sont enprisonné,
La court Karlle demande ; on li a bien conté[2]
Qu’il [la] tient a Orliens chelle boine chité.
Renaus y est venus com homme atapinés,
Par devers Sainte Crois en est li bers alés,
Page:Castets - La Chanson des quatre fils Aymon, 1909.djvu/167
Cette page a été validée par deux contributeurs.
155
les quatre fils aymon
