Ne lor parent meffaire le monte d’un denier.
Li parages Renaut, le courtois et le fier[1],
Endementier qu’il sont el grant estor plenier,
Li un contre les autres por ferir et lanchier,
S’en est issus Renaus sor Baiart le destrier
Et Alars et Guichars et Richars le guerrier.
Cascuns lez va sivant par effort de destrier.
Or les consaut chis sires qui tout a a baillier,
Que se Karllez lez tient, bien [le puis][2] afichier,
Tout li avoirs del mont ne leur aroit mestier
Qu’il ne fussent pendu et au vent bauloié.
Karllez li empererez commencha a huchier :
Baron, or tost après, por le cors S. Ligier.
Se il ensi m’escapent, ichou puis afichier,
Jamais jour de ma vie ne porrai [leechier][3].
Donc saillirent as armez et Normant et Baivier
Et cascuns est montez sur .I. courant destrier.
La se sont pris a poindre par vaus et par rochier,
Les fiex Aimon akeulent [et pristrent a][4] huchier.
Par devant tous lez autres es vous poignant Richier,
Nes fu de Normendie et fu cousins Ogier :
Il escrie Renaut : Retourne, chevalier.
Si ferons une jouste, car je le vous requier.
Dehait ait qui nel veut, dist Renaus le guerrier.
Ambedoi s’entrevienent cascuns sor son destrier,
Grans cops se vont donner ens escus de quartier.
Renaus, le fiex Aimon, le feri tout premier ;
Le haubert li faussa com .I. rain d’olivier,
Parmi le cors li met son fer tranchant d’achier,
Mort l’a jus abatu trez en mi le sentier.
Outre, dist il, vassaus[5], moult estes prisantiers.
Atant vienent Franchois et Normant et Baivier.
Li fil Aimon s’esmaient[6], li vaillant chevalier.
Page:Castets - La Chanson des quatre fils Aymon, 1909.djvu/165
Cette page a été validée par deux contributeurs.
153
les quatre fils aymon
