1. A Touz ceux, qui ces lettres verront & orront, Johan, par la sufferance de Dieu, Evesque de Wyncestre, Amez Cuens de Sauvoie, Henri de Lacy Cuens de Nicole, & Ottes de Grauntzon Chevaler, Messages & Procureurs de treshaut Prince Edward, par la Grace de Dieu, Roi d'Engleterre, Seigneur d'Irlaund, & Duc d'Acquitaigne, salutz en nostre Seigneur.
Nous feisons a savoir que, come por la reformation de la pees entre le dit nostre Seigneur le Roi d'Engleterre d'une part, & tresexcellent Prince Phelippe, par cele mesme grace, Roi de France d'autre part, sur les descordz, & les guerres, meues entre eux, nous, & autre certain Messages & Procureurs du dit nostre Seigneur le Roi d'Engleterre, feussiens plusours foiz, & en divers lieux assemblez, ovesque les Messages & Procureurs du dit Roi de France en son noun & pur li d'autre part, en la busoigne de la reformacion de la pees desusdite;
Les queux traitiez, pur aucuns certains empeschementz, n'estoient pas venuz a effect & a fyn desire:
A la par fin nostre Sires le Rois d'Engleterre devantdit,
Considerant & regardant le Cosinage & la prochienete du lignage qe est entre li & le Rois de France, & la grant affinite & l'alliance novelement faite entre eux par mariages; come celi que est ia fait entre li & le suer du dit Roy de France: & celi que se deit faire de son filz aisnez & la fille du dit Roy de France:
Et pur ce que l'alliance & l'amor de l'un & de le autre soit plus ferme, & que li Rois de France soit a nostre Seigneur le Roi d'Engleterre plus obligez & tenuz, & meillors amis, & aidantz:
Et pur oster les maus & les escandes, que venent de la guerre; & pur le profit commun de tote Cristiente; & le bien & le prechein socours de la terre Sainte:
* Nous ha novellement envoiez & establi especiaument, por pursuyre & mettre a fin le dit treitie, ovesque Monseignor Loeys fils du Roy de France Conte de Eurieus, Robert de Burgoigne, & Johan de Bretaigne, Ducs, & Monsieur Pierre Seigneur de Chambly Chevaler, & Chamberlaine le dit Roi de France, Messages & Procureurs du dit Roi de France:
Entre les queux Messages & Procureurs du dit Roi de France, pur li & en son noun, & nous, pur le dit nostre Seigneur le Roi d'Engleterre, & en noun de li,
Est fait desores & afferme certaine pleine, enterrine, & estable pees, a durer perpetualment a touz jours, por eux, por lor heires, & pur lor successors; & sont totes Rauncures, injures, malluueillaunces, & haines delaissees, remises, & pardones de tot en tot d'une part & d'autre.
2. Et est acorde, par ceste pees feisant, que li Roys de France deit rendre, de meintenant, & restituer, par parole, & par lettre, au dit nostre Seigneur le Roi d'Engleterre, ou a ses Procurours, en noun de li, & as hommes, & soumis du dit nostre Seigneur le Roi d'Engleterre, & as Siens, totes les Citees, Chasteux, Bourgs, Villes, Terres, Rentes, Fiedz, Homages, Obeissances, & Seignories, & totes autres maneres de Justices, de Tenaunces, & de Droitures, & d'autres choses noun movables, coment que eles soient nomes, que furent baillees au Roi de France, ou a ses gentz, en noun de li, par le devantdit nostre Seigneur le Roi d'Engleterre, ou par les Siens: ou qui ont este prises par le Roy de France, ou ses Ministres, ou ses hommes, ou ses allies, en guerre, en la Duchie d'Acquitaign en quelque manere que eles aient este prises, ou occupees, ou autrement soient avenues, ou escheues au Roi de France, ou as Siens, & qui a nostre Seigneur le Roy d'Engleterre, ou as Siens devoient, ou poyent avenir, ou escheir; se ces terres de la Duchee d'Acquitaigne eussent demores en la main du dit nostre Seigneur le Roi d'Engleterre, ou des Siens; c'est asavoir ce quil en tient presentment en sa main, & des autres choses sera selonc la forme, que s'ensuit de cest present acord.
3. Item, les Procureurs & Messages du dit Roi d'Engleterre, a ce establi, en noun de li, & pur li, come pur Duc d'Acquitaigne & Per du France, pur la dite Duchie, devient entrer desores en la foi & l'obeissance le Roi de France, pur les dites terres, purement, simplement, & sans condicion; en faisant serment de feaute en l'alme du dit nostre Seigneur le Roy d'Engleterre:
Et auront li dit Procureur de nostre Seigneur le Roy d'Engleterre, du Roi de France lettres de restitution, & de investiture des terres desusdites, selonc la forme de cest present acord:
Et les ditz Messages devient doner lettres de la foiaute, fait au Roi de France selonc la forme de cest acord:
4. Et, pur bailler & deliverer par fait les Citez, Chasteaus, Villes, Terres, & totes autres choses desusnomees pleinement & entierement, & pur oster toutz empeschements que y pourroyent estre, fust par privileges, ou par dons, que li Roys de France en eust fait, ou done en la terre, ou autrement, coment que s'ensuit,
Li Rois de France envoiera honurable Piere en du Pierre, par la dite grace, Evesque d'Anceurre, Monseignor Robert Duc de Borgoigne, & deux, ou trois autres grantz hommes, bons & suffisantz, que li Rois de France nomera, dedenz la quinzeine de la Penchecouste procheine avenir; qi irront hastivement es parties du dit Duchie, & laboureront loiaument, en bone foi, a oster de tot en tot les ditz empeschementz:
Et par tot la, ou il les purront oster, & touts les lieux ou il n'aura point d'empeschement, il deliveront, & feront deliverer entierment, brievment, & sans delay, au dit nostre Seigneur le Roy d'Engleterre, ou a sa gent pur li:
Et quiteront & absouderont, en noun du dit Roi de France, par especial poair & mandement, qu'il averont sur ceo, Cites, Chafteux, Villes, & Hommes, de quelconqe estate, dignite, ou condicion qu'il soient, des sermentz, foiautez, & homages, qu'il ont faitz au Roy de France, ou a ses gentz en noun de li:
Et leur commanderont q'il facent homages, foiautes & sermentz, & soient oubissant au dit nostre Seigneur le Roi d'Engleterre, & a ses heires, come a leur droiturer Seignur, & ausint a ses hommes, a qui les terres serront rendues; sauve la Sourainte du dit Roi de France.
5. Et, se acun des Privileges ne vueillent retourner au dit nostre Seigneur le Roi d'Engleterre, il mettront diligence & peine, a tot lor poair, loiaument & en bone foi, a ceo quil y returnent:
Et s'il n poeit estre fait, li dit Roi de France fera baillure & deliverer en * tenure, pur les ditz Privilegees, au dit nostre Seigneur le Roi d'Engleterre, ou a ses gentz, pur li, es lieux covenables, Casteux, Villes, terres, fiedz, homages, rentes, & autres tenures meillors, & plus profitables, totes choses & condition regardees, si suffisaument, que tuit purront ver apertement, que li Rois de France ha volunte & desir de parfaire la deliverance, & de restabler, & deliverer au dit nostre Seigneur le Roy d'Engleterre ce que de murroit a deliverer par les ditz empeschementz: Et qu'il n'averoient pas la grace le Roi de France si entierement, qil averoient ou retornant en la maine & l'obeissance le Roi d'Engleterre, pur le damage qu'il y averoit.
Les queles tenures li dit nostre Seigneur li Roys d'Engleterre & ses Heires, & Successours averont & tendront paisiblement & plenerement, od toutz les profitz, jusque tant que li dit privilegez soient pleinement returnez a l'obeissance du dit nostre Seigneur le Roy d'Engleterre.
Et nientmens le dit Roi de France, si Heir, & si Successour, serront tenuz a labourer & purchaser, en bone foi, au plus tost q'il pourront, qe li devantdit privilegez, retornent a la Seignorie, & l'obeissance du dit nostre Seigneur le Roy d'Engleterre, de ses heirs, & de ses Successours, sicome desus est dit.
Et apres ce que li dit privilegez seront retornez en la main du dit nostre Seigneur le Roy d'Engleterre, ou de ses gentz, sicome desus est dit, les dites tenures, que seront baillees depar le Roi de France a nostre Seigneur le Roy d'Engleterre, pur les ditz privilegez, returneront, & devient returner au dit Roi de France, & ses Successours; c'estassavoir tot pur tot, partie pur partie.
6. Et est accorde que li Roys de France fera rendre, a ceux qi se sont tenuz de la partie le Roy d'Engleterre, ce q'il aura donez, ou autrement alienez, en quelque manere que ce foit, de lor heritages, & de lor terres, s'il ne puet auterment accorder a eux:
Et ausint sera il rendre, & delivrer les dons, & les autres choses, alienez, par li, ou en noun de li, ou Demaine du Duchie d'Acquitaigne.
7. Et ne se partiront les dites gentz du Roi de France, envoiez en la Duche d'Acquitaigne, du Pais de la, jusque tant que les dites choses soient parfaites, & acompliez, pleinement & entierment, quant a la deliverance des terres, & au bail des tenures; sicome desus est dit.
8. Et y avera gentz, pur le dit nostre Seigneur le Roy d'Engleterre, a retenoir la deliverance de les dites terres; cestassavoir, nous, Amez de Sauvoie, Henry de Nichole, Contes: Et Ottes de Grauntzon, Chevaler; avantditz; qi laboureroms loiaument & en bone foi, tant come en nous serra, a oster les ditz empeschementz:
Et la, ou hom nous offera raison, selonc la forme de cest present acord, nous le prendrons, & receurons prestement, & sans delaie, loiaument & en bone foi:
Et, se acune des dites persones, de l'une partie, ou de l'autre, estoit empeschez par mort, ou par maladie, li autre pur ce ne laissent mie de aler avant, a parfaire & accompler les choses avantdites, en la manere desusdite.
9. Et jurerent li dit Evesque d'Anceurre, li Duc de Burgoigne: Et li autre, que li dit Roys nomera, jureront en l'alme li dit Rois de France, per son special maundement; & ausint ont jurez, en lor propres almes, sur les Seintes Euuangeilles, que totes ces choses avantdites pleinement deliveront, assigneront, & parferont, en l'avantdite manere, loiaument & en bone foi.
10. Et ausint jurerent les gentz le dit nostre Seigneur le Roi d'Engleterre, en l'alme de celi nostre Seigneur le Roy d'Engleterre, & lor propres almes; cestasavoir, nous, Amez Cuens de Savoie, Henri Cuens de Nicole, & Ottes de Grantzon, Chivaler, desusdit, que nous les dites choses totes chascune parferons, & acomplerons, en la manere desusdite, loiaument & en bone foi.
11. Item, il est accordez que, les dites choses primerement acompliez, quant a la deliverance des terres, & au bail des tenures, sicome desus est dit, les Rois desusditz s'assembleront personaument a Amyens, a la Fest de la Nativite nostre Dame de Septembre prochein avenir, pur affermer, confermer, & jurer les choses desusdites:
Et lors fera li dit nostre Sires, li Rois d'Engleterre, au Roi de France homage lige simplement, sans condicion, come Ducs d'Acquitaigne & Pers de France, pur la dite Duche:
Et ne poet li dit nostre Sires, li Rois d'Engleterre, delaier, ne delaisser a fere le dit homage, en la manere desusdit, pur cas, por dit, ne por fait: Ne pur chose que avenue soit, ne avenir puisse: Ne se purra excuser q'il ne veigne lors * personaument, pur excusation, ne pur empeschement, queux q'il soit; se nestoit par empeschement de maladie de son propre corps, loiaument & en bone foi; ou par empeschement de mer, ou per autre loial empeschement ou essoine, si apparant, & si notoire, que tuit veient q'il ny eit fraud ne barat:
Et, si li ditz empeschementz avenoit (que ja n'aveigne) Monsieur Edward son filz y ferra tenuz avenir en propre persone, od plein & suffisant mandement & poair de faire la dite foiaute, en noun du dit nostre Seignur le Roi d'Engleterre, & de faire, & de parfaire totes les autres choses desusdites, en noun de celi Roi, & come son Procureur a ce establie suffisaument:
Et nient miens, le dit empeschement cessant, li ditz nostre Seigneur le Rois d'Engleterre sera tenuz, de venir personaument, le plus tost q'il purra bonement, de faire, parfaire, & accompler totes les choses desusdites.
12. Item, il est acorde que tout prison & ostage foient delivre & quite, & qe totes maneres des letteres & d'escritz obligatories d'ostagementz, d'une part & d'autre; & totes autres lettres, tuchantz la rendue du Duche d'Aquitaine, faite par le Roi d'Engleterre, en la main le Roi de France, soient rendues, celes, que purront estre trovee, & les autres anulles d'une part & d'autre.
13. Item, est acorde que totes terres & rentes, prises, occupees, ou detenues, par achaison de la guerre des avantditz Rois, par le Roi de France, ou par les siens, des hommes & suggetz le Roi d'Engleterre, soit d'Eglises, ou d'autres persones, soient desores, plenement & entierment, rendues:
Et ausint les terres & les rentes, prises, occupes, ou detenues par le dit nostre Seignur le Roi d'Engleterre, ou par les siens, des hommes & suggetz le Roi de France, soit d'Eglises, ou d'autres persones, queles que elles soient, soient desores, pleinement & entierment, rendues a ceux, a qui elles estoient avant.
14. Item, est acord que ceux de la Duche d'Acquitaigne, que ont este de la partie le Roi de France en la guerre, reveignent en la bien vueillance, & a la grace nostre Seigneur le Roi d'Engleterre:
Et ausint que ceux, du dit Duche, qi ont este de la partie nostre Seigneur le Roi d'Engleterre en la guerre, reviegnent desores en la bien vueillance, & a la grace du Roi de France.
15. Derechief, il est acorde qe li Rois de France sera son profit des aques, des acrois, & des amendementz, q'il ha faitz en la terre, tant q'il l'ad tenue en sa main, en baillant au dit nostre Seineur le Roy d'Engleterre, tenant de condicion suffisant; sauf ce que, d'oures, de manconages, & d'amendementz, de edifices, restors, ne recompensations ne se sera.
16. Et, pur ce que totes maneres de descordz soient appeses, & que nulle manere de dissension ne demoerge, par raison de temps passez, entre les ditz Rois; accorde est que les Pees ancienes, faites & eues entre les ditz Rois, & leur Antecessours, soient fermes & estables: Et les avoms affermees, & confermees en noums des ditz Rois decea & dela.
17. Derechief, est acorde que ceux, qi irront en Duchie d'Acquitaigne, pur les dits Rois, decea & de la, sicome desus est dit, averont poair de purloigner, & aloyner, par commun acord, le dit terme de la Nativite nostre Dame (s'il veient que mestier soit, ou que le profit de la busoigne le requerre) a un autre terme, qu'il veront que bon sera.
18. Les queux choses, & chascune de iceles, sicome eles sont desus devisees & escrites, nous acordoms, voloms, agreoms & promettoms, loiaument & en bone foi, come Message & Procureur du dit nostre Seigneur le Roi d'Engleterre, pur li, & en noun de li, & por ses heirs & por ses Successours, a eles garder, tener & acomplir, firmement & loiaument, a toutz jours; sanz venir encontre par quelconque raison, ou cause en temps avenir.
19. Et que nous les feroms ratefier, & approver par nostre dit Seigneur, le Roy d'Engleterre: Et les jurer en s'alme; & de ce doner ses lettres overtes, contenantes totes les choses desusdites.
20. Et de totes ces choses nous avoms fait, & donez, en noun du dit nostre Seigneur, le Roi d'Engleterre, & en l'alme de li, serment corporel, as Seinctes Euuangeilles, en la presence des ditz Messages & Procureurs du dit Roi de France.
En tesmoigne de queu chose nous avoms fait mettre, en ces presentes lettres, nos propres seaux.
Don. a Paris le vintisme jour de May, l'an de grace mil, trois centz, & trois.
