Aataentſic la Lune, & toutesfois que leur Cabane eſt ſituée au bout de la terre, c’eſt à dire vers noſtre mer Oceane : car au delà c’eſt vn pays perdu pour eux, & auant qu’ils euſſent eu quelque commerce auec nos François, ils ne s’imaginoient pas qu’il y euſt ſous le Ciel vne autre terre que la leur, & maintenant qu’ils ſont deſ-abuſez de ce coſté-là, encor croyent-ils, au moins pluſieurs, que leur terre & la noſtre ſont deux pieces tout à fait detachées, & parties des mains de diuers ouuriers. Ils diſent donc que quatre ieunes hommes entreprirent autresfois ce voyage pour s’informer eux-meſmes de la verité, qu’ils trouuerent Iȣskeha tout ſeul dans ſa Cabane qui les reçeut fort humainement. Apres quelques complimẽs de part & d’autre à la mode du Pays, il leur donna aduis de ſe cacher en quelque coing, autrement qu’il ne reſpondoit pas de leur vie, qu’Aataentſic eſtoit pour leur ioüer vn mauuais tour, s’ils ne ſe tenoient ſur leur garde. Ceſte Megere arriue ſur le ſoir, & comme elle prend telle figure que bon luy ſemble, s’apperceuant qu’il y auoit de nouueaux hoſtes en la maiſon, elle priſt la forme d’vne belle ieune fille bien parée, auec vn beau collier, & des bracellets de
Page:Brébeuf - Relation de ce qui s’est passé dans le pays des Hurons en l’année 1636.djvu/92
Cette page a été validée par deux contributeurs.
![](http://upload.wikimedia.org/wikipedia/commons/thumb/6/60/Br%C3%A9beuf_-_Relation_de_ce_qui_s%E2%80%99est_pass%C3%A9_dans_le_pays_des_Hurons_en_l%E2%80%99ann%C3%A9e_1636.djvu/page92-1024px-Br%C3%A9beuf_-_Relation_de_ce_qui_s%E2%80%99est_pass%C3%A9_dans_le_pays_des_Hurons_en_l%E2%80%99ann%C3%A9e_1636.djvu.jpg)