garçon, qui eſtoit preſque touſiours malade, & comme tout etique auant le Bapteſme s’eſtoit du depuis parfaictement bien porté. Cecy ſuffira pour monſtrer comme Noſtre Seigneur va leur imprimant vne grande opinion de ce diuin Sacrement laquelle ſe fortifie par la bonne & entiere ſanté que Dieu nous donne, & qu’il a touſiours donnée à tous les François qui ont eſté en ce pays : car, diſent-ils, c’eſt merueille qu’horſmis vn seul qui eſt mort icy de ſa mort naturelle, tous les autres, depuis vingt cinq ans ou enuiron qu’on y hante, n’ayent quaſi pas eſté malades.
De tout cecy on pourra facilement recueillir l’eſtat preſent du Chriſtianiſme naiſſant en ce pays, & l’eſperance du futur. Deux ou trois choſes y ſeruiront encor. La premiere eſt la methode que nous tenons à l’inſtruction des Sauuages. Nous aſſemblons les hommes le plus ſouvent que nous pouuons, car leurs conſeils, leur feſtins, leurs ieux, & leurs danſes ne nous permettent pas de les auoir icy à toute heure, ny tous les iours. Nous auons égard particuliement aux Anciens, d’autant que ce ſont eux qui determinent & decident des affaires, & tout ſe fait ſuiuant leurs aduis
