Or il auint iuſtement que la neuſaine eſtãt accomplie, que fut le treizieſme Iuin, nous ne peuſmes paracheuer la Proceſſion ſans pluye, qui ſuiuit fort abondante, & dura à diuerſes repriſes l’eſpace de plus d’vn mois auec vn grand amandement & accroiſſement des fruicts de la terre, & d’autant que, comme ie l’ay dit, ces terres ſablonneuſes demanderoient quaſi des pluyes de deux iours l’vn, vne autre ſechereſſe eſtant ſuruenuë depuis la my-Iuillet iuſque à la fin du mois, nous entrepriſmes vne autre neufuaine en l’honneur de noſtre B. Pere S. Ignace, par des prieres duquel nous euſmes dés le lendemain de la neufuaine encommencée, & du depuis, telle abondance de pluyes qu’elles firent parfaictement eſpier les bleds, & les amenerent à maturité, de ſorte qu’il y a eu ceſte année autant de bled que de long temps.
Or ces pluyes ont fait deux biens ; l’vn en ce qu’elles ont accreu les fruicts de la terre, et l’autre en ce qu’elles ont étouffé toutes les mauuaiſes opinions & volontez conçeues contre Dieu, contre la Croix, & contre nous ; car tous les Sauuages de noſtre cognoiſſance, & notamment de noſtre village, ſont venus expreſſément nous trou-
