Cette page n’a pas encore été corrigée
Li fiuz Hebron, et qu’il devint,
En queu terre aler le couvint,
Et qués oirs de li peut issir,
Et queu femme le peut nourrir,
Et queu vie Petrus mena,
Qu’il devint n’en quel liu ala,
En quel liu sera recouvrez :
A peinnes sera retrouvez ;
Que Moyses est devenuz,
Qui fu si longuement perduz :
Trouver le couvient par reison
(De parole ainsi le dist-on)
Lau li riches Peschierres va ;
En quel liu il s’arrestera,
Et celui sache ramener
Qui orendroit s’en doit aler.
Ces quatre choses rassembler
Couvient chaucune, et ratourner
Chascune partie par soi
Si comme ele est ; meis je bien croi
Que nus hons ne’s puet rassembler
S’il n’a avant oï conter
Dou Graal la plus grant estoire,
Sanz doute, ki est toute voire.
