Cette page n’a pas encore été corrigée
Que il celui le recommant
Qu’il le gart dès or en avant.
Lors sera la senefiance
Acomplie et la demoustrance
De la benoite Trinité,
Qu’avons en trois parz devisé.
Dou tiers, ce te di-ge pour voir,
Fera Jhesu-Criz sen vouloir,
Qui sires est de ceste chose :
Nus oster ne li puet ne ose.
Quant le veissel à Bron donnas
Et grace et tout li bailleras
Et tu en seras desseisiz,
Ces feiz mout bien touz acompliz,
Adonques s’en ira Petrus,
Je ne vueil qu’il y demeurt plus ;
Car vraiement dire pourra
Que il seisi véu aura
Hebron, le riche Pescheeur,
Et dou veissel et de l’onneur :
Pour ce Petrus fu demourez
Dusqu’au mein, puis s’en est alez.
Quant ce aras fait, il se mouvra,
Par terre et par mer s’en ira,
