Page:Boron - Le Roman du Saint-Graal, éd 1861.djvu/156

Tout ce qu’il seut de Jhesu-Crist
Et ce que la vouiz l’en eut dist.
Meistres Robers dist de Bouron,
Se il voloit dire par non
Tout ce qu’en cest livre afferroit,
Presqu’à cent doubles doubleroit ;
Meis qui cest peu pourra avoir,
Certeinnement pourra savoir
(Que, s’il y vicut de cuer entendre,
Assez de bien y porra prendre)
Ces choses que Joseph aprist
A sen neveu et qu’il li dist.
Et quant tout ce li eut moustré,
Si ha sen neveu apelé ;
Dist li : « Biaus niés, boens devez estre,
Quant de no seigneur, de no meistre,
Avez teu grace recouvrée
Qu’ele vous est de Dieu donnée. »
Lors le mena Joseph arriere,
Et à sen pere et à sa mere
Dist que ses freres gardera
Et que touz les gouvernera
Et ses sereurs ; et il l’otroient
Que souz lui à gouverner soient.