Cette page n’a pas encore été corrigée
Brons o sa fame s’en ala,
L’enfès o Joseph demoura
Lors dist Joseph : « Biaus niés, por voir,
Mout grant joie devez avoir :
Nostres-Sires par son pleisir
Vous ha eslut à lui servir
Et à essaucier sen douz non,
Qu’assez loer ne le puet-on.
Biaus douz niés, cheveteins serez
Et vos freres gouvernerez.
De delez moi ne vous mouvez,
Ce que vous direi retenez.
La puissance de Jhesu-Crist,
Le nostre sauveeur eslist,
S’il li pleist qu’il parout à moi,
Si fera-il, si cum je croi. »
Joseph à sen veissel ala,
Mout devotement Dieu pria
Demoustrast li de son neveu
Comment il li feroit son preu.
Joseph a finé s’oroison,
Et tantost ha oï le son
De la vouiz, ki li respondi :
« Tes niés est sages, ce te di,
