Fous est qui pourchace folie
Pour ceste dolereuse vie. »
Brons et sa femme lonc tens furent
Ensemble tout ainsi con durent,
Tant que il eurent douze fiuz
Et biaus et genz et parcréuz ;
Et en furent mout encombré
(Car bien leur couvint à plenté),
Tant qu’Enyseus à Bron palla,
A son seigneur, et dist li ha :
« Sire, vous déussier (_sic_) mander
Joseph men frere, et demander
Que nous feruns de nos enfanz :
Vez-les touz parcréuz et granz ;
Car nous riens feire ne devuns
Que ainçois à lui n’en palluns. »
Brons dist : « Tout ausi le pensoie
Que je à vous en palleroie ;
Mout volentiers à lui irei
Et de boen cuer l’en prierei. »
Brons vint à Joseph, si li dist,
Tout ainsi con li plut et sist,
Que sa suer l’eut là envoié,
De cele besoigne touchié :
Page:Boron - Le Roman du Saint-Graal, éd 1861.djvu/143
Cette page n’a pas encore été corrigée
