puisse, ne doive plaire. Biaus, très dous sir, de tant sommes joiant[1] que en nous n’a eu, s’il plaist à Diu nulle defaute, et vous prions et ramentevons à memoir d’une lettre que nous receumes de vous à Mallines, la quelle contenoit que vous aviez tout plain de boins amis qui bien vous amonestoient et enfourmoient, et par les quelles vous estiés bien garnis, que coment vous trouvessiez ou pensier trouver pais ou accors au Roi vostre seigneur, vous tenniés que eu cas la fin en menret[2] que essilh et dextruccions pur vous et pur vos amys. Ore prions Dieu que vous puissez avoir voz ditz amis bien owy et bien entendu et que vous soiez si bien garnis et enantis[3] sur vostre fait que vous n’aiez busoigne d’avoir remembrance du conselx ne des garnimentz que on vous souvent pur bien et pur honneur mis (sic) devant pendant les choses dessus dites. Nostre Seigneur vous eit en sa sainte garde. Donné à Londres, le xiiie jour de march.
Très reverent pière en Dieu et très chers sir et cousyns. Nous resceumes voz lettres le xe jour de march dierrainement passé, à Londres, entre les autres choses contenuz qe, Dieu eidant, vous serrez à la journée ordennée, et qe li Roi devers vous a ordeinné de là envoier bien souffisamment, le quel, très reverent pier, est auxi ordeiné par le Roi monseignur, qi, si Dieu plest, y envoira en tele manère qe pur cause qe par decha (sic) en serra nul faute, et pur ce qe, tant come appent, il ne plaist mie au Roi monseignur qe nous soions à la dite journée, si vous prions qe en ce nous voiliez avoir pur escusé, très reverent et très cher sir, et encore et d’abondant contenu voz lettres q’il vous est convenu hasteement entendre à apaiser aucun novellit[é], et les queles nous devions bien savoir qi estoient suvenuz entre le Roi par de là et le Roi de Navarre, la quele discension est tout apaisié, et est li Roi de Navarre dou tout venuz à
