nous vous escrivons le plus principal, si come raison est, quar certes, très cher et amé cousin, nous cognoissons molt bien l’amour, confort et bone volenté que nous avons trové prestement en vous, dont nous vous mercions très cherement, et vous promectons laiaument qe à touz jours vous nous trouverez bien prest et en grant desir de faire pur vous toutes choses qe en ce monde faire purrons et devrons par honneur, car, en verités, nous nous y reputons pur grantement tenuz. Très cher et amé cousin, nous sommes à accort ovesqes Monsegneur le Roi, si come cy dessus est dit. Si ne voudrions pur riens que souz l’ombre de nostre fait il preist aucune damage, quar vous savez q’il nous seroit tourné à si grant mal et blame qe jammés n’en serroions lavéz, et par Dieu, beau très cher pière, nous tenons fermement que vous ne le voudriez pas, ne aussi qe nous eussions reffusé rayson de Monsegneur le Roi, puis q’il la nous offroit. Pur quoi nous vous faisons savoir et prions cherement qe tout l’armée et apparaille qe fait aviez pur nous, vous laissez et deffaciez du tout, quar il n’en n’est mais mestier, Dieu mercie, et en tant come vous avez travaillé et fraié pur nous grandement, par ma foi, très cher père, tout ensi ferrons-nous pur vous de corps et de chevance, quant vous voudriez, en touz les cas qe faire purrons saunz blame. Très cher cousin, nous ne voudriens qe en la fiance de nous, ne pur nostre fait, aucune de voz gentz de par delà preissent damage, et pur ce vous faisons savoir certain qe les portz de Normandie, especialment ceux où les gentz de Monsegneur le Roi pensoient que vous pensiez mieulz descendre sont de nouvell bien grossement garniz et enforciéz de navire et des gentz. Très chers et très améz cousin, Nostre Seigneur vous ait en sa saint garde. Escript à Mante samedy vigile des Brandons.
Très chers et très amés sir et cousins, nous avons receu voz lettres, les quelles nous vindrent mardy le xie jour de march à Londres contenuz[1], entre les autres choses, ensi come vous estes acordé et
- ↑ Contenant.
