Page:Bernard - Federic de Sicile.djvu/99

quî ne l’avoit jamais abandonné, il envoya un Herault au Prince de Majorque, pour choiſir un jour propre à deceder leurs differens. Menfroy aima mieux riſquer une Bataille navale, que de fatiguer ſes peuples par une longue guerre, qui auroit interrompu leur commerce, le jour donc fut pris pour le combat. Camille n’avoit point veu Federic en particulier depuis long-temps, il s’eſtoit gliſſé une eſpece de froideur entre eux qui ſe gliſſe aiſément quand la tendreſſe n’eſt pas reciproque. Comme ils ne ſe parloient plus que de choſes indifferentes, elle prit l’occaſion de luy demander ce qu’il penſoit de ſon frere, & ſi ſon procede ne luy donnoit pas beaucoup de haine pour toute leur famille, car elle n’oſoit plus luy dire qu’elle la craignoit en ſon particulier ; Madame, luy dit-il d’un air tendre, vous ſçauriez aſſez ce que je penſe, ſi vous me connoiſſiez un peu mieux ; c’étoit aſſez pour l’engager à une explication qu’elle avoit tant deſirée ; il eſt aiſé de juger qu’ils ſe racommoderent, les querelles ne durent gueres quand on a de la diſpoſition de part & d’autre à