Page:Bedier - La Chanson de Roland.djvu/90

Cette page a été validée par deux contributeurs.

Nen unt poür ne de murir dutance.
Li emperere s’en repairet en France ;
830Suz sun mantel en fait la cuntenance.
Dejuste lui li dux Neimes chevalchet
E dit al rei : « De quei avez pesance ? »
Carles respunt : « Tort fait kil me demandet !
Si grant doel ai ne puis muer nel pleigne.
835Par Guenelun serat destruite France.
Enoit m’avint un’ avisiun d’angele
Qu’entre mes puinz me depeçout ma hanste :
Chi ad juget mis nés a rereguarde.
Jo l’ai lesset en une estrange marche.
840Deus ! se jol pert, ja n’en avrai escange. » AOI.

LXVIII

Carles li magnes ne poet muer n’en plurt.
.C. milie Francs pur lui unt grant tendrur
E de Rollant merveilluse poür.
Guenes li fels en ad fait traïsun :
845Del rei paien en ad oüd granz duns,
Or e argent, palies e ciclatuns,
Muls e chevals e cameilz e leuns.
Marsilies mandet d’Espaigne les baruns,
Cuntes, vezcuntes e dux e almaçurs,
850Les amirafles e les filz as cunturs :
.IIII. C. milie en ajustet en .III. jurz.
En Sarraguce fait suner ses taburs ;
Mahumet levent en la plus halte tur :
N’i ad paien nel prit e ne l’aort.
855Puis si chevalchent par mult grant cuntençun