E d’Oliver li peiset mult forment,
Des .XII. pers e de la franceise gent
Qu’en Rencesvals ad laiset morz sanglenz.
Ne poet muer n’en plurt e nes dement
E priet Deu qu’as anmes seit guarent.
Las est li reis, kar la peine est mult grant ;
Endormiz est, ne pout mais en avant.
Par tuz les prez or se dorment li Franc.
N’i ad cheval ki puisset ester en estant :
Ki herbe voelt, il la prent en gisant.
Mult ad apris ki bien conuist ahan.
Carles se dort cum hume traveillet.
Seint Gabriel li ad Deus enveiet :
L’empereür li cumandet a guarder.
Li angles est tute noit a sun chef.
Par avisiun li ad anunciet
D’une bataille ki encuntre lui ert :
Senefiance l’en demustrat mult gref.
Carles guardat amunt envers le ciel,
Veit les tuneires e les venz e les giels
E les orez, les merveillus tempez,
E fous e flambes i est apareillez :
Isnelement sur tute sa gent chet.
Ardent cez hanstes de fraisne e de pumer
E cez escuz jesqu’as bucles d’or mier,
Fruissent cez hanstes de cez trenchanz espiez,
Cruissent osbercs e cez helmes d’acer.
En grant dulor i veit ses chevalers.