cheux moy. On tint conseil apres disner : de là nous fumes cheux Madame ; puis le roy vint a mon logis voir ma chambre ou quand on parloit en un coin, pour bas que ce fut, on l'oyoit en l’autre. Il fit faire l’apres souper une excellente musique.
Le mardy 24me le roy tint conseil. Il fut voir Madame. Il arriva un ambassadeur extreordinaire de Mantoue[1]. Le roy se trouva un peu mal.
Le mercredy 25me je menay l'ambassadeur extreordinaire de Venise a sa premiere audience.
Il arriva a Suse un ambassadeur extreordinaire de Gesnes. Mr de Harbaut demanda au roy s’il se couvriroit parlant a luy : le roy en fut en doutte et m’envoya querir pour m’en demander mon avis. Je luy dis que j'avois veu couvrir un autre ambassadeur que la republique de Gesnes avoit envoyé au roy ; que c’estoit une republique quy ne cedoit rien ou fort peu a celle de Venise ; qu’anciennement le roy [ne] faisoit point couvrir les ambassadeurs de Ferrare, Mantoue et Urbin ; que depuis quelques années Elle les avoit fait couvrir ; que Gesnes ne passe pas seulement devant eux, mais devant Florence mesme, et qu’a mon avis le roy les devoit faire couvrir ; neammoins s’ils ne le pretendoint point, qu’Elle s’en pourroit passer. Sur cela Mr de Chasteauneuf arriva, a quy le roy ayant demandé la mesme chose, dit de pleine volée que non, et que les Gesnois estoint ses sujets, lesquels prendroint avantage de cette concession comme d’un tiltre qu’ils
- ↑ Le marquis Alexandre Striggio, principal ministre du duc de Mantoue. Suivant un mémoire imprimé dans les Lettres du cardinal de Richelieu (t. III, p. 278), le marquis Striggio était arrivé avant le 21 avril.
