poser aux trouppes qu’il avoit fait mettre en battaille, lesquelles le comprindrent sy bien qu’ils demanderent tous qu’il les menat au combat, ce qu’il fit en mesme temps, et ayant cheminé une partie de la nuit du 2 au 3me de mars, il arriva a la pointe du jour au lieu ou ces generaux avesques leurs trouppes estoint logés confusement proche de Reinfeld, quy estans montés a cheval en desordre, furent tout le reste de mesme, de sorte que, les soldats estans fuis, les chefs quy voulurent faire quelque resistance furent tués ou prisonniers, et les quattre generaux pris, avec leurs canons, enseignes, cornettes, et bagage, et la tuerie fut sans resistance aussy longtemps que les trouppes du duc voulurent poursuyvre les Imperiaux.
Cette victoire sy heureuse, sy grande, sy complette, et sy inopinée, mit le duc de Waimarch en une grande reputation, luy donna en proye toute l’Alsasse, et mit en grande consternation le party de l’empereur jusques au Danube, n’y ayant aucune armée, ny chef, ny mesmes de trouppes en son nom plus proches qu’en Hesse où estoit le general Geuts[1] quy n’avoit pas ses trouppes prestes de sortir de leurs quartiers d’hiver, quy est plus aspre et plus long que par deça, de sorte que le Waimarch peut sans resistance se saysir de Fribourg[2] et de plusieurs autres villes, Reinfeld s’estant rendu a luy peu apres sa victoire[3], et commença comme a investir Brisac[4] quy avoit espuisé
