Ma niece fut trouver le lendemain samedy 21me Mr Bouteillier le pere quy luy reconfirma la mesme chose avec des asseurances tres grandes, la pria de me les donner de sa part, et me fit dire encor le mesme jour la mesme chose par Mr du Tramblay, lequel me fit aussy voir une lettre que le pere Josef son frere luy escrivit le mardy 24me, par laquelle il l’asseuroit que Mr Bouteillier le fils me devoit apporter dans deux jours les despesches de ma liberté, lequel vint le lendemain mercredy 25me, et ne m’apporta aucune nouvelle, ou m’en dit une quy ne m’aggrea gueres, que le roy partoit le jour mesme pour aller coucher a Chantilly et de là passer en Lorraine ; car je me douttay bien que pendant son absence je n’estois pas sorty d’un lieu ou j'estois retenu depuis quattre ans et demy : aussy Mr du Tramblay quy fut le lundy 29me[1] a Ruel voir monsieur le cardinal, ne me rapporta rien de bon, et depuis ce temps là je n’ay eu aucune esperance de ma sortie ; et mesmes ma niece de Beuvron quy a esté vingt fois aux lieux ou se tenoit monsieur le cardinal, pour luy parler, n’a jamais sceu avoir acces aupres de luy, ny mesmes faire en sorte que l’on luy dit qu’elle estoit là.
Aust. — Cependant l'arriere ban de Normandie, composé de pres de deux mille chevaux, fut ammené par Mr le duc de Longueville, et le samedy 14me d’aust fit montre pres de Saint Denis, et en suitte s’achemina a Chalons ou estoit leur rendés vous.
Le roy aussy demanda aux cantons une levée de douse mille Suisses quy luy fut accordée ; et le
- ↑ Il faut lire : 30me.
