passa le lendemain la riviere et vint loger a Saint Emilion[1], ou Mr de Chevreuse, nouvellement marié avesques la vefve de Mr le contestable de Luines[2], le vint trouver.
Le dimanche 22me, le roy vint loger a Castillon, ou Mr le Prince le vint trouver, lequel pensant en son voyage prendre le fort que les huguenots avoint fait vis a vis de Blayes, estoit arrivé a Bordeaux pour y prendre quelques vaisseaux anglois quy estoint a la rade, lesquels ne voulans venir, Mr le Prince fit mettre du canon sur le quay quy est devant Chasteau Trompette, pour les battre ; mais eux, apres avoir tiré quelques coups de leurs vaisseaux sur ce quay, se mirent a la voile et se jetterent en pleine mer. Il pensoit aussy faire la capitulation de Tonains ; mais Mrs d’Elbeuf et mareschal de Temines sçachans sa venue, se hasterent de recevoir la ville a capitulation. Mr de la Force vers lequel il avoit envoyé Mr de la Ville aux Clercs, secretaire d’Estat, auquel il avoit quelque creance, fit response qu’il attendroit la venue du roy a Sainte Foy pour achever ce qu’il avoit projetté avesques ledit sieur de la Ville aux Clercs ; de sorte que Mr le Prince quy pensoit trouver encores le roy a Royan, le vit a Castillon, et ne fit rien que remettre quelques chasteaux de peu de consequence, comme Gensac et autres, en l’obeissance du roy.
Comme il revint, il luy sembla que le roy ne luy fit pas assés bonne chere, et voyant que j’estois fort en
