les vint prendre pour les presenter au roy aux genoux duquel s’estans jettés, ils firent des tres humbles summissions. Le roy leur dit en suitte peu de parolles, et le garde des sceaux plus amplement, et en fin leur pardonna.
Le lundy 30me le roy vint au fort de Beaulieu voir passer les trouppes quy entroint dans la Rochelle, assavoir ses gardes françoises et suisses ; puis revenu a Laleu disner, il s’alla puis apres promener a l’entour de la ville depuis la porte Neuve jusques a Tadon, et de la il revint par les digues, ou il y eut en celle de Coreilles une solive quy fondit sous luy, et s’il n’eut esté leste de se jetter en avant, il alloit au fond de la mer.
Le mardy 31me il fit fort mauvais temps. Le roy ne bougea de Laleu. Mr le cardinal de la Vallette s’en alla a Paris.
Novembre. — Le mercredy premier jour de novembre, et de la Toussaints, le roy fit ses pasques a Laleu ; je le servis : puis il toucha les malades. Je fis aussy mes pasques.
Apres disner il vint au fort de Lafons et de là a la porte de Coygnes ou monsieur le cardinal luy presenta les clefs de la ville, puis en suitte le peuple quy luy cria misericorde. Puis il entra dans la ville ayant immediatement devant luy monsieur le cardinal seul, et devant, Mrs d’Angoulesme, Chomberg et moy en un rang, puis les mareschaux de camp, La Curée et Effiat, deux a deux, et ainsy marcha cet ordre jusques a Sainte Margueritte ou le pere Souffran fit un sermon, puis vespres en suitte. Tous les canons de la ville, des pointes, et de la mer, tirerent. Puis le roy s’en retourna a Laleu.
