Le jeudy 26me les deputés des Rochelois quy estoint en mer, revindrent rendre grace a monsieur le cardinal de celle qu’il leur avoit accordée au nom du roy, et ceux de la Rochelle accepterent aussy les conditions que l’on leur avoit proposées.
Le roy s’alla promener en mer vers sa flotte.
Le vendredy 27me tout fut d’accord pour la reddition de la Rochelle.
Le roy se fut promener vers le Plom.
Le samedy 28me Mrs de Marillac et du Hallier eurent ordre de sinner les articles pour le roy quy ne voulut point les sinner avec ses sujets, et nous en suitte ne le voulusmes faire.
Le roy s’alla la nuit promener a Chef de Bois pour voir la flotte angloise par un tres beau temps et une lune tres claire.
Le dimanche 29me Monsieur prit congé du roy pour s’en retourner a Paris : je le fus accompagner. Puis Toiras me vint prier de trouver bon que comme gouverneur d'Aulnis il ammenat les deputés de la Rochelle faire les sommissions au roy. Je luy dis que tous gouvernemens cessoint ou les lieutenans generaux estoint ; que comme mareschal de camp il les pourroit aller prendre avec Le Hallier, et me les ammener, quy les presenterois a monsieur le cardinal, et luy au roy ; dont il fut bien marry ; mais il prit rayson en payement. Je les allay donc prendre a l’entrée des lignes, les mareschaux de camp Marillac et Le Hallier les estans allés querir de ma part a la porte Neuve. Je les fis mettre pié a terre environ trois cens pas proche du logis du roy, et moy demeurant a cheval les menay a Laleu, et a l’entrée de la chambre monsieur le cardinal
